Global Title

Улсын төсвийн 2.7 тэрбум төгрөгийн хөрөнгөөр 5 дугаар хорооны “Залуус” хэсгийн инженерийн шугам сүлжээний ажлыг “Бумбод” ХХК нь 2026 оныг дуустал хугацаанд гүйцэтгэхээр БХБЯ-тай гэрээ байгуулсан бөгөөд шугам сүлжээний ажлын ган хоолой, лотки зэрэг материалуудаа татан авах ажлууд хийгдэж байна.

 Энэ жилийн ажлын хүрээнд 670 метр ус, дулааны шугамын угсралтын ажил, УДДТ-3-ын доторх тоноглолуудыг шинэчлэх зэрэг ажлууд хийгдэхээр төлөвлөгдсөн байна.

Дүүргийн ОНХСангийн хөрөнгө оруулалтаар 22,23 дугаар байрны ард 5032м2 талбайд нийт 100 авто машины зогсоолын ажлыг Поларис Рөүд Инженеринг ХХК гүйцэтгэж байна.

Тус ажлын гэрээний хугацаа 07 сарын 02-ны өдрөөс 12 сарын 25-ны өдрийг хүртэл бөгөөд өнөөдрийн байдлаар 20 хувийн гүйцэтгэлтэй явагдаж байгаа юм. Одоогийн байдлаар хайрга асган индүүдэх, тэгшлэх ажил хийгдэж байна.

Тулгар төрийн 2233 жил, Их Монгол Улс байгуулагдсаны 818 жил, Үндэсний эрх чөлөө, тусгаар тогтнолоо сэргээн мандуулсны 113 жил, Ардын хувьсгалын 103 жил, Багануур хотын 44 жилийн ойг тохиолдуулан ажил үйлсээрээ манлайлж, хөдөлмөр зүтгэлээ өндрөөр үнэлүүлсэн эрхэм хүндтэй хүмүүст Монгол улсын төрийн дээд одон, медаль гардууллаа.

Улс, эх орон, дүүргийнхээ хөгжилд оруулж буй хувь нэмэр, ажил хөдөлмөрийнхөө үр шимийг төр засагтаа үнэлүүлж, Монгол Улсын Төрийн дээд одон, медалиар шагнагдсан та бүхэнд баяр хүргэж, эрүүл энх, аз жаргал хүсэн ерөөе.

Тулгар төрийн 2233, Их Монгол улс байгуулагдсаны 818 жил, Үндэсний эрх чөлөө тусгаар тогтнолоо сэргээн мандуулсны 113 жил, Ардын хувьсгалын 103 жилийн ойн Үндэсний их баяр наадмын өсвөрийн сурын харвааны 12-14 насны ангилалд Боловсрол сургуулийн сурагч Б.Учрал 4-р байр, Боловсрол сургуулийн сурагч Д.Оюундарь шилдэг уухайчин, 9-11 насны ангилалд Гүн Галуутай сургуулийн сурагч Ц.Анар 2-р байр эзэлсэн амжилт гаргажээ.

Дасгалжуулагчаар Аймгийн мэргэн, Спортын мастер Ж.Содномпил, Аймгийн мэргэн, Спортын мастер Б.Жаргалсайхан нар ажилласан байна.

Үндэсний их баяр наадамд цэц мэргэнээ сорин амжилттай оролцсон багш дасгалжуулагч, харваачдадаа баяр хүргэе.

“Нүүрэнтэйн хүчтэн” бөхийн дэвжээний бөхчүүд “Талын толгой сувилал”-д наадмын бэлтгэлд гараад байгаа бөгөөд өнөөдөр дэвжээний наадмын сорилго барилдаан боллоо.

Сорилго барилдаанд Ховд аймгийн Дарви сумын харьяа Аймгийн начин Б.Доржжүгдэр түрүүлж, Аймгийн арслан Ч.Мөнхбат үзүүрлэв.

Дүүргийн Засаг даргын орлогч Б.Балжинням, ТНААХ-ийн дарга Д.Дэмчигжав нар Нүүрэнтэйн хүчтэн бөхийн дэвжээний галаар зочилж, бөхчүүддээ амжилт хүсээд, баяр наадамдаа нутаг орныхоо нэрийг гаргаж, сайн барилдахыг хүсэн ерөөлөө.

2020-2023 онд нийтийн зориулалттай орон сууцны 31 байрны фасад засварыг хийсэн бол энэ жил үлдсэн 27 байрны дулаалгатай фасад засварын ажил 50 хувьтай хэрэгжиж байна.

Ингэснээр дүүргийн хэмжээний угсармал 57 байр бүрэн фасад засварт орж дуусна.

Ташрамд өнгөрсөн хугацаанд 28 байрны 35 блокийн дээвэр засвар, 12 байрны 23 орцны их засварыг хийж гүйцэтгэж, иргэдийн амьдрах орчныг сайжрууллаа.

ЗДТГ, Багануур ХК, Монголын волейболын холбоо хамтран U-14 насны волейболын улсын аварга шалгаруулах тэмцээнийг 07 сарын 01-нээс 07 сарын 08-ны өдрийг хүртэлх хугацаанд зохион байгуулж байна.

Тэмцээнд 21 аймаг, 9 дүүргийн охидын 74 багийн 900 гаруй тамирчид, хөвгүүдийн 80 багийн 1000 орчим тамирчид, 120 гаруй багш дасгалжуулагчид оролцож байгаа юм.

Тэмцээний нээлтийн үйл ажиллагаа 07 сарын 02-ны өдөр зохион байгуулагдаж өндөрлөлөө. Энэ үеэр дүүргийн Засаг дарга С.Даваасүрэн Улсын зэрэглэлтэй Багануур хотод зохион байгуулагдаж буй U-14 насны волейболын УАШТэмцээнд хүрэлцэн ирж оролцож буй нийт баг тамирчдад амжилт хүслээ. Мөн дуучин Батух өсвөрийн баг тамирчдад амжилт хүсч уран бүтээлийн дээжээс хүргэсэн юм.

Тэмцээн Уурхайчин спорт цогцолбор, Хүний хөгжлийн ордны спорт заал, Гүн галуутай сургуулийн спорт заалуудад зохион байгуулагдаж байна.

Тэмцээнд оролцож буй баг тамирчдад амжилт хүсье.

“Багануур-Ус” ААТҮГ нь дүүргийн ард иргэд, аж ахуй нэгж байгууллагыг унд, ахуйн усаар хангах, бохир ус татан зайлуулах мөн дулаан түгээх үйлчилгээг үзүүлдэг. Дүүргийн нийтийн эзэмшлийн орон сууцууд 1978-2002 онуудад ашиглалтад орсон бөгөөд инженерийн шугам сүлжээний эдэлгээний хугацаа дууссан тул шинэчлэх нэн шаардлагатай байдаг.

Орон нутгийн хөгжлийн сангийн хөрөнгө оруулалтаар бохир усны шугамын материал худалдан авах тендер зарлагдаж, тендерт шалгарсан компани нь материалыг “Багануур-УС” ААТҮГ-т хүлээлгэж өгснөөр 1-61-р байрны ариутгах татуургын хэвтээ шугам сүлжээг шинэчлэх ажлыг сүүлийн жилүүдэд үе шаттайгаар бүрэн хийж гүйцэтгэлээ.

Ингэснээр байрнуудын зоорины давхарт бохир усны алдагдалгүй болж бохир ус татан зайлуулах үйл ажиллагаа хэвийн явагдаж иргэдийн ая тухтай амьдрах орчин нөхцөл бүрдэж байна.