Category : Мэдээ мэдээлэл

Нийслэлийн лаборатори Боловсрол цогцолбор сургуульд хэрэгжүүлж буй олон улсын сургалтын хөтөлбөрийн хэрэгжилтийн талаар Боловсрол, шинжлэх ухааны сайд Л.Энх-Амгалан, УИХ-ын гишүүн Ц.Сандаг-Очир нар танилцлаа.

Боловсрол цогцолбор сургуульд 87 бүлгийн 2771 хүүхэд боловсрол эзэмшдэг бөгөөд 191 багш ажилтантай юм. Улсын хэмжээнд математик, физикийн хичээлээр дээгүүр үнэлэгддэг бол ЭЕШ-ын гүйцэтгэл дунджаас дээгүүр үнэлэгдэж, Pearson олон улсын хөтөлбөрийг хэрэгжүүлж байна. Энэхүү хөтөлбөр нь багш болон сурагчдын талархлыг хүлээж, сургалтын чанарт мэдэгдэхүйц нөлөөлж буй талаар тус сургуулийн захирал Б.Буянхишиг танилцуулав.

Түүнчлэн анх байгуулагдсан цагаас хойш 2 хичээлийн байрнууд их засварт ороогүй бөгөөд нийт 2 орчим тэрбум төгрөгийн их засвар хийх шаардлагатайг дүүргийн Засаг дарга С.Даваасүрэн танилцуулснаар ирэх 2024 оны улсын төсөвт тус хичээлийн байрны дотор сантехник, халаалтын шугамын их засварыг хийж өгөхөө сайдын зүгээс хэллээ.

Энэ үеэр боловсролын багц хууль, салбарын эрх зүйн орчныг сайжруулж, олон улсын стандартад нийцүүлэх, багш бэлтгэх болон үнэлгээний тогтолцоо, сургуулийн өмнөх, бага, дунд болон дээд боловсролын бодлогын шинэчлэл, насан туршийн боловсрол, боловсролын санхүүжилт зэргээр багш нартай санал солилцлоо.

2-р хороонд 100 ортой цэцэрлэгийн барилгын ажлыг анх 2019 онд Данитос ХХК эхлүүлсэн бөгөөд өнөөдрийн байдлаар ажил 85 хувьтай, үндсэн барилгын дотор засал болон уурын зуухны барилгын гадна, дотор засвар дутуу байгаа юм.

Энэ асуудалд БШУ-ы сайд Л.Энх-Амгалан шүүмжлэлтэй хандаж, хариуцлагатайгаар ирэх 5 сард ашиглалтад оруулж, улсын комисс ажиллуулан хүлээж авахыг үүрэг болгож, долоо хоног бүр хийсэн ажлыг баримтжуулан яаманд хүргүүлж ажиллахыг санууллаа.

Энэ үеэр дүүргийн Засаг дарга С.Даваасүрэн нийслэлийн Боловсролын газрын дарга Б.Амартүвшинд тус цэцэрлэгийг ашиглалтад ороход 24 цагийн цэцэрлэгийн бүлгийг шилжүүлж нэг дор төвлөрүүлэх, бага сургууль, цэцэрлэгийн цогцолбороор ашиглах саналтай байгааг уламжилж, харилцан зөвшилцөлд хүрлээ.

УИХ-ын гишүүн, Засгийн газрын гишүүн, БШУ-ы сайд Л.Энх-Амгалан, УИХ-ын гишүүн Ц.Сандаг-Очир, нийслэлийн Боловсролын газрын дарга Б.Амартүвшин болон бусад холбогдох албаны хүмүүс өнгөрөгч өдөр /2023.04.17/ дүүрэгт ажиллалаа.

Дүүргийн 235-р цэцэрлэгийн үйл ажиллагаатай танилцсан юм. Тус цэцэрлэг анх 2016 онд ашиглалтад орсон бөгөөд өнөөдрийн байдлаар 94 хүүхэд сургуулийн өмнөх боловсрол эзэмшиж байна.

Цэцэрлэгийн гол онцлог нь тоглонгоо суралцахуй сургалтын технологийг 2016 оноос хойш хэрэгжүүлж, бусад цэцэрлэгүүдэд түгээн дэлгэрүүлж ажиллаж байна. Мөн нийслэлийн хэмжээнд боловсролын үнэлгээний индексээр дээгүүр үнэлэгддэг, багшийн гүйцэтгэлийн үнэлгээгээр Г.Цэвэлмаа багш 1-р түвшинд шалгарсныг дээд байгууллагаас онцолж, багшийн арга зүйтэй танилцлаа.

Дүүргийн зүгээс тус цэцэрлэгийн гадна тохижилтын ажлыг хийлгэх хүсэлтээ илэрхийлсэн бол БШУ-ы сайд Л.Энх-Амгалан энэ онд багтан шийдвэрлэхээр болсон юм.

Нийслэлийн Багануур дүүргийн Засаг даргын дэргэдэх “Бүжиг бүжиг” чуулгаас зохион байгуулсан “Монгол туургатан-2023” олон улсын хүүхдийн наадам өнгөрөгч өдөр буюу 2022 оны 04 сарын 16-ны өдөр зохион байгуулагдлаа. Уг тэмцээнд БНСУ, Якут улс, Монгол улсын нийслэл Улаан баатар хот болон, аймаг бүрээс 19 хамтлагийн 350 гаруй хүүхэд оролцлоо.

Наадмыг дүүргийн Засаг дарга С.Даваасүрэн нээж, мэндчилгээ дэвшүүлэн, хүндэтгэл үзүүллээ.

Энэ жилийн наадмын онцлог нь харилцан туршлага солилцох, хүүхдийн бүжгийн урлагийн хөгжүүлэх нь онцлог байсан бөгөөд 5 номинациар өрсөлдлөө.

АЛТАН ҮЕИЙН ДЭГЛЭЭЧДИЙН УРАН БҮТЭЭЛИЙГ ӨВЛӨН УЛАМЖЛАГЧ ТӨРӨЛД:

1-р байр- Дорноговь аймгийн Говийн уянга-1

2-р байр-Улаанбаатар хот Хөх толбот хамтлаг

3-р байр БНСУ-ын Сөүл хотын Монгол сургуулийн хамтлаг

ТУХАЙН УЛС, УГСААТНЫ ОНЦЛОГ ХАДГАЛСАН УРАН БҮТЭЭЛ ТӨРӨЛД:

1-р байр-Якут улсын бүжгийн хамтлаг

2-р байр- Баян Өлгий аймгийн бүжгийн хамтлаг

3-р байр- Баян Өлгий аймгийн бүжгийн хамтлаг

ХҮҮХДЭД ЗОРИУЛСАН УРАН БҮТЭЭЛ ТӨРӨЛД

1-р байр-Улаанбаатар хот Туурганы чимээ хамтлаг

2-р байр- Дорноговь аймгийн бүжгийн хамтлаг

3-р байр- БНСУ-ын Сөүл хотын Монгол сургуулийн хамтлаг

ШИНЭЭР НАЙРУУЛСАН УРАН БҮТЭЭЛ ТӨРӨЛД

1-р байр Улаанбаатар хотын Төвөргөөн хамтлаг

2-р байр Улаанбаатар хот Сувдан шигтгээ хамтлаг,

3-р байр Говьсүмбэр аймгийн Болоржин хамтлаг

БҮЖГИЙН УЛАМЖЛАЛ, ШИНЭЧЛЭЛ ХАДГАЛСАН УРАН БҮТЭЭЛ ТӨРӨЛД

1-р байр Өвөрхангай аймгийн бүжгийн хамтлаг

2-р байр Улаанбаатар хотын Суран жолоо хамтлаг

3-р байр Баян Өлгий аймгийн бүжгийн хамтлаг тус тус шалгарлаа.

Харин СӨБ-ийн бүжгийн хамтлагаар

Тэргүүн байр 142-р цэцэрлэг Лхам багштай Авьяас хамтлаг

1-р байрыг Төв аймгийн Мөнгөн морьт сумын Оддын гялбаа хамтлаг,

Гоцлол шилдэг бүжигчнээр: 241-р цэцэрлэг А.Дүүрэнзаяа нар шалгарлаа.

НААДМЫН ГРАНПРИ ШАГНАЛААР:

Дорноговь аймгийн Говийн уянга-1 хамтлаг шалгарлаа.

Энэхүү наадам дүүрэгт 2 дахь жилдээ зохион байгуулагдаж байгаа бөгөөд наадмын үеэр “Багшийн гавьяа” цолоор БНСУ-ын Сөүл хотын Монгол сургуулийн багш Г.Сийлэгмаа, Якут улсын бүжгийн багш А.Лариса, 142-р цэцэрлэгийн багш Ч.Лхамаа нар шагнагдлаа.

Наадмыг зохион байгуулахад туслалцаа үзүүлсэн байгууллагуудад баярлалаа.

Авьяаслаг бяцхан хүүхдүүдээ үргэлж дэмждэг эцэг эхчүүддээ баяр хүргэе.

Наадмыг санаачлан зохион байгуулсан “Бүжиг бүжиг” чуулгыг үүсгэн байгуулагч МУГБагш Б. Балжинням багшдаа эрүүл энх, ажлын өндөр амжилтыг хүсье.

2023 оны Өсвөрийн шатарчдын хөвгүүдийн 54, охидын 48 дахь удаагийн аварга шалгаруулах шигшээ тэмцээн 2023 оны 04-р сарын 01-05-ны өдрүүдэд Улаанбаатар хотноо амжилттай зохион байгуулагдлаа.

Тэмцээнийг 7 насны 14 ангилалд 21 аймаг, 33 академи клубийн нийт 720 орчим өсвөрийн шилдэг шатарчид 5 өдрийн турш оюун ухаан, уран нүүдлээрээ өрсөлдөж дүнгээ гаргажээ.

Багануур Төр Монгол шатрын клубийн энэхүү тэмцээнд амжилттай оролцож,

14 насны охидын ангилалд Баярсайханы ХУЛАН алтан медаль,

8 насны охидын ангилалд Дорждэрэмийн МӨНХ-АЯЛГУУ мөнгөн медаль, Чинзоригийн НАНДИНЖИГҮҮР хүрэл медаль,

8 насны хөвгүүдийн ангилалд Нямтулгын БИШРЭЛТ шагналт 5-р байранд шалгарч БАГИЙН дүнгээр ХҮРЭЛ медаль хүртсэн байна.

Дүүргийн 5-н хорооны Иргэдийн Нийтийн Хурал өнөөдрөөс эхэлж байна. Өнөөдөр 1-р хорооны ИНХ хуралдаж, хурлаар хорооны Засаг дарга, Өрхийн эрүүл мэндийн төв, Цагдаагийн хэсэг, Сууц өмчлөгчдийн холбоод хийж хэрэгжүүлсэн ажлын тайланг тавьж, нэмэлтээр Засаг даргын орлогч Б.Балжинням хөрөнгө оруулалтын мэдээллийг хийлээ.

1-р хороо 2539 өрхийн 8588 хүн амтай. Төрөөс үзүүлж буй анхан шатны үйлчилгээг иргэдэд хүргэхээс гадна Засгийн газраас хэрэгжүүлж буй Халамжаас хөдөлмөрт шилжих бодлогын хүрээнд тодорхой ажлыг хийж гүйцэтгэжээ.

Тодруулбал тус хороонд хүнсний эрхийн бичиг хэрэглэдэг 93 өрх байсан бол өрхийн амьжиргааг дэмжих богино хэмжээний төсөл, байнгын болон түр ажлын байранд иргэдийн зуучилснаар өнөөдөр гэхэд 25 өрх хүнсний эрхийг бичиг хэрэглэдэг болжээ. Цаашлаад энэ ондоо багтаж хүнсний эрхийн бичиггүй хороо болохыг төлөө ажиллаж байгаагаа хороон Засаг дарга Б.Лхамсүрэн хэлж байлаа.

Өнөөдрийн хуралд 182 өрхийн төлөөлөл оролцож хорооны үйл ажиллагааг ХАНГАЛТТАЙ гэж дүгнэж, төр захиргааны байгууллагын удирдлагууд, байгууллага, аж ахуйн нэгжийн төлөөлөл оролцож иргэдийн сонирхсон асуултад хариулт өгсөн юм.

Хүнс худалдаа, нийтийн хоол, ахуйн үйлчилгээний салбарын бизнес эрхлэгчдийн дунд “НӨХӨРСӨГ” 3 төрөлт тэмцээн 2 өдрийн турш үргэлжилж, 12 багын 100 гаруй тамирчид өрсөлдсөн бөгөөд нээлтийн үйл ажиллагаанд УИХ-ын гишүүн Ц.Сандаг-Очир, УИХ-ын гишүүн, МУ-ын шадар сайд С.Амарсайханы ажлын албаны төлөөлөгч Б.Батжаргал, бие төлөөлөгч Ц.Тунгалаг болон ИТХ-ын дарга Т.Отгонболд, ЗДТГ-ын дарга П.Баттүшиг нар оролцлоо.

Энэ үеэр Иргэдийн Төлөөлөгчдийн хурал болон Засаг даргын Жуух, баярын бичгээр 20 иргэнийг шагнаж урамшуулсан юм. Мөн хувиараа хөдөлмөр эрхлэгчдийн зүгээс АНУ-д олон улсын бүжгийн тэмцээнд оролцох эрхээ авсан Сорхугтани хамтлагт 500.000 төгрөгийг хандивлалаа.

ДАРТСЫН ТӨРӨЛД

1-р байр: Гэр хүрээ баг

2-р байр: Найзууд баг

3-р байр: Монрубин ХХК-ийн баг

БОУЛИНГИЙН ТӨРӨЛД

1-р байр: Монрубин ХХК баг

2-р байр: Хишиг уул ХК-ийн баг

3-р байр: Найзууд баг

ГАР БӨМБӨГИЙН ТӨРӨЛД

1-р байр: Симба баг

2-р байр: Хишиг уул ХК-ийн баг

3-р байр: Найзууд баг

НИЙЛБЭР ДҮНГЭЭР

1-р байр: Найзууд баг

2-р байр: Симба баг

3-р байр: Хишиг уул ХК-ийн баг тамирчид тус тус байр эзэллээ.

Улсын хэмжээнд жил бүрийн 04-р сарын 01-нээс 05. 01-ний  хооронд Хөдөлмөрийн аюулгүй байдал эрүүл ахуйн сарын аяныг зохион байгуулдаг.

Олон улсын хөдөлмөрийн байгууллагаас “Ажлын байран дахь хөдөлмөрийн аюулгүй байдал, эрүүл ахуйн дэлхийн өдөр” болгон тэмдэглэдэг бөгөөд энэ онд “Эрүүл аюулгүй ажлын байр нь хөдөлмөрийн хүрээний суурь зарчим ба эрхийн асуудал мөн” гэсэн уриатайгаар ажиллаж байна.

Харин манай улсын хэмжээнд “Хөдөлмөрийн аюулгүй байдал, эрүүл ахуйн сарын аян-2023” арга хэмжээг “Эрүүл аюулгүй ажил-Бидний суурь эрх” уриан дор аж ахуйн нэгж байгууллагууддаа өөрсдөө санаачлан

1. Хөдөлмөрийн аюулгүй байдал, эрүүл ахуйн чиглэлээр ажилтнуудын мэдлэг ойлголтыг бататгах, аяны үйл ажиллагааг байгууллага ажиллагсдын дунд өрнүүлж ажиллах;
2. Ажил олгогч нь ҮОМШӨ-өөс урьдчилан сэргийлэх соёл зан үйлийг төлөвшүүлэх, ХАБЭА-н болон Хөдөлмөрийн тухай хуулиар хүлээсэн эрх үүргээ хэрэгжүүлж, зөвлөмж гаргаж ажиллах;
3. Эрүүл аюулгүй ажлын байрны нөхцөлийг бий болгож, ажилчдынхаа эрүүл мэнд болон нийгмийн асуудалд чиглэсэн ажлыг зохион байгуулах.
4. Эрсдэл өндөртэй тодорхой ажлын байруудад эрсдэлийн үнэлгээ, хөдөлмөрийн нөхцөлийн үнэлгээ хийлгэх болон тодотгол хийх зэрэг чиглэлүүдийг дүүргийн ХАБЭА зөвлөлөөс чиглэл болголоо.

Мөн нээлтийн үеэр  Хөдөлмөр нийгмийн харилцааны дээд сургуулийн ХАБЭА-н сургагч багш, докторант О.Алтанхуяг ХАБЭА-н байгууллагын соёл, Аюулгүй ажиллагааны соёл, үйлдвэрлэлийн осол болон бусад сэдвээр сургалт зохион байгуулж, 230 гаруй төлөөлөл хамрагдлаа.