Хүн ам нийгмийн салбарынхан анх удаа команд штабын сургуулилтыг хийж байна
Монгол Улсын Шадар сайдын баталсан бодлого, төлөвлөгөөний дагуу Онцгой байдлын ерөнхий газраас Хүн ам, нийгмийн хамгааллын улсын албанд зохион байгуулж байгаа /Гэр бүл, хөдөлмөр, нийгмийн хамгааллын яам/ гамшгаас хамгаалах команд штабын сургууль өнөөдөр эхэллээ.
Хүн ам, нийгмийн хамгааллын улсын алба нь 48 цагийн турш газар хөдлөлтийн гамшгийн үед хэрхэн ажиллах, ямар бэлтгэл бэлэн байдлыг хангах талаарх дадлага сургуулилалтыг хийх юм.
Дадлага сургуулилтад Гэр бүл, хөдөлмөр хамгааллын яам, Нийгмийн даатгалын ерөнхий газар, Хөдөлмөр, халамж үйлчилгээний ерөнхий газар, Хүүхэд, гэр бүлийн хөгжил хамгааллын ерөнхий газар, Хөгжлийн бэрхшээлтэй хүний хөгжлийн ерөнхий газар, Хөдөлмөр, нийгмийн хамгааллын сургалт, үнэлгээ, судалгааны институт, Хөдөлмөрийн аюулгүй байдал, эрүүл мэндийн төв болон 21 аймаг, 9 дүүргийн бүтцийн нэгжүүдийн нийт 400 гаруй ажилтан, алба хаагч оролцож байна.
Жил бүр өсөн нэмэгдэж байгаа гамшгийн аюулаас урьдчилан сэргийлэх, учирч болзошгүй эрсдэлийг бууруулах, гамшгаас хамгаалах үйл ажиллагаанд олон нийтийн оролцоог хангах, энэ чиглэлээр иргэд, олон нийтэд мэдлэг ойлголт олгох сургалт, сурталчилгааг тогтмол зохион байгуулах шаардлага бий болсоор байна. Судалгаанаас харахад гамшигт өртөж амь насаа алдагдсдын ихэнх хувийг хүүхэд, эмэгтэйчүүд, хөгжлийн бэрхшээлтэй иргэд эзэлж байна.
Анх удаа улсын албанд буюу Хүн ам, нийгмийн хамгааллын улсын салбарын хэмжээнд дадлага сургуулийг зохион байгуулж байгаа гэдгээрээ энэ сургуулилалт онцлог.
Гамшгаас хамгаалах хүн ам, нийгмийн хамгааллын улсын алба /ГБХНХЯ/ гамшгаас хамгаалах төлөвлөгөөг тодотгох, бие бүрэлдэхүүний бэлтгэл бэлэн байдал, удирдах бүрэлдэхүүний шийдвэр гаргах, цагийн байдлыг үнэлэх, гамшгийн үед ажиллах ур чадварыг дээшлүүлэх, шуурхай штабын үйл ажиллагаа, харилцан ажиллагааг тодорхойлох зорилготой юм.
Боловсролын сургалтын байгууллагын орчинд электрон тамхи хэрэглэхийг хориглолоо
ДЭМБ-аас хийсэн судалгаагаар электрон тамхи /vape/-ны хэрэглээ нь хүний тархины үйл ажиллагаанд урт хугацаанд сөргөөр нөлөөлж, эрүүл мэнд, амь насанд нь аюул, эрсдэл учруулж, сэтгэл түгших эмгэг, оюуны хомсдол, донтолт, уушги цоорох эмгэг зэргийг үүсгэж буй нь тогтоогджээ.
Ялангуяа өсвөр насандаа электрон тамхи хэрэглэсэн хүүхэд утаат тамхи, никотинд донтох эрсдэл эрс нэмэгддэг байна. Иймд Боловсролын сайдын 2024 оны “Боловсролын сургалтын байгууллагын орчинд электрон тамхи хэрэглэхийг хориглох тухай” тушаал гарлаа.
Үүнтэй холбогдуулан доор дараах арга хэмжээг авч хэрэгжүүлэхийг өмчийн хэлбэр үл харгалзан бүх түвшний боловсролын сургалтын байгууллагын эрхлэгч, захирал, ректор нарт үүрэг болгов. Үүнд:
Суралцагчийн өөрийн удирдлагын байгууллага, холбогдох төрийн болон төрийн бус байгууллагатай хамтран электрон тамхины хор уршиг, эрүүл мэндэд үзүүлэх хор нөлөөний талаар ойлголт, мэдээлэл өгөх сургалт, нөлөөллийн арга хэмжээг насны онцлогт тохируулан тогтмол зохион байгуулах;
Электрон тамхи хэрэглэдэг суралцагчтай ганцаарчилсан уулзалт зохион байгуулах, сэтгэл зүйн зөвлөгөө, үйлчилгээнд хамруулахад эрүүл мэндийн байгууллагатай хамтран ажиллах;
Сургалтын байгууллагын дүрэм, дотоод хэм хэмжээнд сургуулийн орчинд электрон тамхи хэрэглэхийг хориглосон зохицуулалт тусгах.
Мөн эцэг эх, асран хамгаалагч, харгалзан дэмжигчдийг хүүхдэдээ тавих хараа хяналтаа сайжруулах, электрон тамхины хор нөлөө, эрүүл мэндэд учрах эрсдэлийн талаар ярилцаж, ойлгуулахыг уриалж байна.
Багануурын өсвөрийн жүдочдын амжилтын буухиа үргэлжилсээр
Спортын төв ордны “А” зааланд жүдо бөхийн өсвөр үеийнхний “Борнуур кап-2024” тэмцээн арваннэгдүгээр сарын 5-8-ны өдрүүдэд зохион байгуулсан бөгөөд тэмцээнд Улаанбаатар хот, хөдөө орон нутгийн 65 багийн нийт 1223 тамирчин бага, дунд, ахлах насны ангилалд 52 жингийн аваргуудаа тодрууллаа.
Тус тэмцээнийг санаачлан зохион байгуулж буй “Борнуур” клубийг үүсгэн байгуулагч ОУХМ С.Солонгогэрэл нь самбо бөхийн ДАШТ-ий хүрэл, Азийн АШТ-ий мөнгө, Танхимын Азийн наадмын хүрэл, Элсний Азийн наадмын хүрэл, УАШТ-ий дөрвөн удаагийн аварга, дөрвөн мөнгөн медальтай ба жүдо бөхийн Хүүхдийн их наадмын хүрэл, УАШТ-ий гурван мөнгөн медальтай тамирчин юм.
Багануур дүүргээс А.Хурц-Од дасгалжуулагчтай “Хоши Жүдо” клубийн 18 тамирчин оролцож 60кг жинд Г.Ананд алтан медаль, 66 кг-ийн жинд Б.Соронзонболд хүрэл медаль хүртжээ.
Энхтайвны корпусын сайн дурын ажилтнууд дүүрэгт 2 жилийн хугацаатай ажиллана
2024-2025 оны хичээлийн жилд АНУ-ын Энх тайвны корпусын Сайн дурын ажилтан Gabriel Adamian, Lori Willard нар Гүн галуутай, Боловсрол сургуульд 2 жилийн хугацаатай ажиллахаар болсон.
Өнөөдөр Монгол дахь АНУ-ын ЭТК-ын Хөтөлбөрийн менежер Г.Баярсайхан, Д.Зоригтбаатар, Хөтөлбөр хариуцсан мэргэжилтэн Н.Доржнамжин нар дүүргийн удирдлагууд болон боловсролын салбарын удирдлага мэргэжилтнүүдтэй сайн дурын ажилтны үйл ажиллагаа болон цаашид хамтран ажиллах чиглэлээр уулзалт зохион байгууллаа.
Сайн дурын ажилтан ЕБС-ийн багш, суралцагчдын англи хэлний боловсрол, сургууль хамт олны хөгжлийг дэмжих чиглэлээр төлөвлөгөө гарган үйл ажиллагаагаа хэрэгжүүлдэг бөгөөд төрийн албан хаагчдын Англи хэлний боловсролыг сайжруулах сургалт, клубийг хичээллүүлж хамтран ажиллах талаар санал солилцлоо.
Шатрын дэлхийн аварга шалгаруулах тэмцээнээс Б.Ану мөнгөн медаль хүртжээ
2024 оны 10-р сарын 27-ны өдрөөс 11-р сарын 5-ны өдрүүдэд Грек улсын Родос хотноо зохион байгуулагдсан сонирхогчдын Дэлхийн аварга шалгаруулах тэмцээнд 53 орны 245 шатарчин оюун ухаанаа уралдуулжээ.
Тэмцээний 1700 хүртэлх чансаатай шатарчдын эмэгтэйчүүдийн ангилалд өрсөлдсөн Багануур дүүргийн тамирчин Сод сургуулийн 7-а ангийн сурагч БАЯРТ-УЧРАЛЫН АНУ 9 өрөг тоглож 6 хожил, 2 тэнцээ, 1 хожигдолтой 7 оноо авч Олон улсын чансаагаа 70,4 ахиулж Дэлхийн аваргын МӨНГӨН медалийн эзэн болсон байна.
Дүүргийн Засаг дарга С.Даваасүрэн Б.Ануд амжилт хүсэж мөнгөн дэмжлэг үзүүлсэн юм. Мөн энэ сарын 16-27-ны өдрүүдэд Итали улсын Монтэсилвано хотод зохиогдох өсвөрийн шатарчдын дэлхийн аварга шалгаруулах тэмцээнд оролцохоор төлөвлөж байгаа юм байна.
Монгол Улсын гавьяат дасгалжуулагч Ц.Батболд багшийн удирдлаган дор Б.Ану 4 наснаасаа хичээллэж эхэлжээ. Одоо тэр бээр Dreamchess клубийн дасгалжуулагч Ч.Баттүвшин багшийн удирдлаган дор бэлтгэлээ хангаж байгаа ажээ.
Дөрөвдүгээр сарын нэгний өдрийг хүртэл мотоциклийн хөдөлгөөнийг түр хугацаагаар хориглолоо
Дүүргийн нутаг дэвсгэрт мотоциклтэй замын хөдөлгөөнд оролцохыг 2024 оны 11 дүгээр сарын 01-ний өдрөөс 2025 оны 04 дүгээр сарын 01-ний өдрийг хүртэл хугацаагаар хориглоно.
Багануурын өсвөрийн усанд сэлэлтийн тамирчид хувийн амжилтаа ахиуллаа
Монголын Усан спорт сонирхогчдын холбооны нэрэмжит ”Ерөнхийлөгчийн цом-2024” усанд сэлэлтийн тэмцээн 11 сарын 1-3-ны өдрүүдэд Улаанбаатар хотноо Баянгол спорт хорооны бассейнд зохион байгуулагдаж тэмцээнд 27 клуб байгууллагын 494 тамирчин өрсөлдлөө.
Энэ удаагийн тэмцээнд Ш.Харцага дасгалжуулагчтай Багануур дүүргийн Засаг Даргын дэргэдэх усанд сэлэлтийн өсвөрийн шигшээ багийн 21 тамирчин оролцож дараах амжилтыг гаргалаа. Үүнд:
А.Амгалан дельфин сэлэлт 50м 2-р байр мөнгөн медаль
А.Цэц-Оюу мэлхий сэлэлт 50м 3-р байр хүрэл медаль
Ү.Ариунболор дельфин сэлэлт 200м 2-р байр мөнгөн медаль
И.Энхжин мэлхий сэлэлт 200м 3-р байр хүрэл медаль, өвөр сэлэлт 400м 3-р байр хүрэл медаль
Б.Гуамарал дельфин сэлэлт 200м 3-р байр хүрэл медаль тус тус хүртэж хувийн амжилтаа ахиулсан байна.
Тус тэмцээнд оролцсон баг тамирчдад дүүргийн Засаг дарга С.Даваасүрэн амжилт хүсэж, мөнгөн дэмжлэг үзүүлсэн юм.
Ташрамд дурдахад 2025 оны 02 сард Tailand, Bangkok улсад зохиогдох Азийн нээлттэй сургуулиудын тэмцээн, 04 сард усанд сэлэлтийн улсын аварга шалгаруулах тэмцээнд оролцох төлөвлөгөөтэй байгаа аж.