Хэрлэнбаян-Улааны отрын бүсэд багануур дүүргийн 165 малчин өрхийн 65000 толгой мал өвөлжиж байна
Монгол Улсын Шадар сайд С.Амарсайхан, ХХААХҮ-ийн сайд Х.Болорчулуун нар Хэнтий аймгийн Дэлгэрхаан сумын Хэрлэнбаян-Улаан тосгоны аймаг дундын отрын бүс нутагт ажилласан юм. Энэ үеэр Багануур дүүргийн 1-р хорооны малчин М.Лхагвадаш гуайн өвөлжөөнд очиж, өвөлжилтийн нөхцөл байдалтай газар дээр нь танилцлаа.
Багануур дүүргийн өвөлжилтийн нөхцөл байдал, Улсын онцгой комиссоос ирүүлсэн тусламжийг малчид болон мал бүхий иргэдэд шуурхай хүргэх ажлын талаар Дүүргийн Засаг дарга С.Даваасүрэн танилцуулж, өвөл, хаврын энэ цаг үед бэлэн байдлаа хангаж, малчдад туслалцаа, дэмжлэгийг үргэлжлүүлэн үзүүлж ажиллахыг Шадар сайд үүрэг болголоо.
Энэ үеэр Улсын онцгой комисс болон Багануурчуудын хандив, тусламжийг ОБХ-ийн дарга, дэд хурандаа Г.Батжаргал, 1-р хорооны Засаг дарга Б.Лхамсүрэн нар М.Лхагвадаш гуайн гэр бүлд гардуулж өгсөн юм.
Гамшгийн эрсдлийг бууруулах тусгай зориулалтын автомашинаар хангагдлаа
Өнөөдөр Монгол Улсын Шадар сайдын ажлын алба, Онцгой байдлын ерөнхий газраас Нийслэлд ашиглагддаг гал түймрийн болон авран хамгаалах ажиллагаанд зайлшгүй шаардлагатай тусгай зориулалтын автомашин болон нийслэлийн Засаг даргын нөөц хөрөнгөөр аврах ажиллагааны багаж, хэрэгслүүдийг нийслэлийн Онцгой байдлын газрын тэргүүн дэд дарга, хурандаа Д.Мөнхсайхан дүүргийн Онцгой байдлын хэлтэст хүлээлгэн өглөө.
Энэхүү тусгай зориулалтын автомашиныг өндөр барилга буюу 9-12 давхар барилгад үүссэн гал түймрийн болон хүний амь насыг авран хамгаалах ажиллагаа явуулах үед ашигладаг юм. Мөн манай дүүрэгт 9 давхар 7 орон сууц ашиглалттай байдаг. Цаашид 9-12 давхар барилгууд олноор баригдаж эхэлж байгаа энэ цаг үед нэн чухал ач холбогдолтой юм.
Тус автомашин нь Монгол орны цаг уурт тохируулан Япон улсад үйлдвэрлэсэн бөгөөд тус Исузу маркын автомашин нь 32 метр хүртэл сунадаг шатаар тоноглогджээ.
Энэ үеэр ОБХ-ийн жолооч ахлах ахлагч И.Отгонбаатар Тээврийн цагдаагийн албаны Осолгүй манлай жолоочоор шагнагдсан юм.
УИХ-ын гишүүд иргэдийн саналыг сонсож, зарим асуудлыг шийдвэрлэлээ
УИХ-ын чуулган завсарласан энэ цаг хугацаанд Шадар сайд, УИХ-ын гишүүн С.Амарсайхан, УИХ-ын гишүүн Ц.Сандаг-Очир Налайх, Багахангай, Багануур дүүрэгт ажиллаж, 5 өдрийн 19 удаагийн уулзалтаар 64 байгууллагын 2500 ажилтан албан хаагч, иргэд сонгогчидтой уулзан, тэдний санал бодол, байр суурийг сонслоо.
Уулзалтаар ажилтан, алба хаагчид Үндсэн хуулийн нэмэлт өөрчлөлт, Хөгжлийн банкны зээл, Нүүрсний гэх хэргийн мөрдөн шалгах ажиллагааны явц, 1072 хувьцааны ногдол ашиг, Олон нийтийн сүлжээнд хүний эрхийг хамгаалах хуулийн төсөл, цалин хөлс, дүүрэгтэй холбоотой дулааны цахилгаан станц, хөрөнгө оруулалт, түрээслээд өмчлөх орон сууц, төрийн албан хаагчдын орон нутгийн нэмэгдэл урамшуулал зэрэг тулгамдсан асуудлуудын талаар асуулт тавьж, хариулт авч, орон нутгаас сонгогдсон 2 гишүүн маань төр засгаас гаргаж байгаа шийдвэр амьдралаас тасархай, хөрсөн дээр бууж өгөхгүй байгаа тал дээр шүүмжлэлтэй хандаж үг хэлж бидний дуу хоолой болж байгаад талархаж явдгаа илэрхийлж байлаа.
Уулзалтын үеэр хувь гишүүдийнхээ зүгээс Багануур ХК нь оны өмнө 23 тэрбумын төсвийн зээл авах шийдвэр гарсан ч оны өмнө 9 тэрбум төгрөгийн зээлээ аваад үлдэгдэл зээл гацсан байсныг Сангийн яамны төрийн нарийн, Эрдэнэс Монголын удирдлагуудтай ярилцаж ойрын үед шийдэх талаар тохиролцсон тухай мөн дүүргийн инженерийн шугамын шинэчлэлийн ажлын 3.5 тэрбумын өртөгтэй Ус сувгаас тавьсан ажлыг өмнөх Барилга хот байгуулалтын сайдаас эхлүүлэн хөөцөлдөж, УСЕГ дээр УБ хотын цэвэрлэх байгууламжийн чиглэлээр тусгагдаад ашиглагдахгүй байгаа хөрөнгө оруулалтын төсвийн зориулалтыг өөрчлөн дүүргийн цэвэр бохир усны шугамын шинэчлэлийн хөрөнгө оруулалт болгохоор одоогийн сайдтай ярилцсаны үр дүнд энэ хөрөнгө оруулалтын төсвийг манай дүүрэг руу шилжүүлэх ажлыг дэмжихээ илэрхийлсэн. Ингэснээр 2023 онд цэвэр бохир усны шугамын шинэчлэлийн ажил эхлэх боломж бүрдэж байгаа юм.
Монгол Улсын Шадар сайд, УИХ-ын гишүүн С.Амарсайхан, Ц.Сандаг-Очир нар өмнө дүүрэгт ажиллаж, өвөлжилтийн нөхцөл байдалтай танилцаж тусламж, дэмжлэг үзүүлэхээ илэрхийлж байснаа уулзалтын үеэр Багануур, Багахангай, Налайх дүүрэгт тусламжийг үзүүлж байгааг дуулгаж Багануур дүүрэгт 80тн хивэг, 20тн долоолго тусламж үзүүлсэн юм.
УИХ-н гишүүдийн уулзалтууд БААН-ийн ажлын байран дээр нь нэг бүрчлэн очиж ажилтан албан хаагч нартаа биечлэн уулзаж орон нутгийн удирдлагууд зарим асуудлуудыг газар дээр нь шийдвэрлэх, цаашид хэрэгжүүлж ажиллах ажилдаа тусгаж арга хэмжээ авч ажиллах, тулгамдсан асуудалд гарц гаргалгааг олж шийдэх тухай хэлэлцэж байгаагаараа онцлог байлаа.
УИХ-ЫН ГИШҮҮН Ц.САНДАГ-ОЧИРЫН АЖЛЫН АЛБА
Сар шинийн баярын өдрүүдэд шуурхай ажиллагааны бригад, жижүүрийн хуваарийг гарган, хяналт тавьж, болзошгүй осол, аливаа эрсдэлээс урьдчилан сэргийлж ажиллахыг үүрэг болголоо
Дүүргийн удирдах ажилтнуудын шуурхай зөвлөгөөн өнөөдөр болж, Засаг дарга С.Даваасүрэн удирдан явуулав. Өмнөх шуурхай зөвлөгөөнөөр дүүргийн засаг даргаас өгсөн үүрэг даалгаварын хэрэгжилт 95.1 хувьтай байсныг ЗДТГ-ын дарга П.Баттүшиг танилцуулаа.
БАГАНУУР ДҮҮРЭГ ДЭХ ЦАГДААГИЙН ХЭЛТЭСТ 44 ДУУДЛАГА БҮРТГЭГДЖЭЭ
Өнгөрсөн 14 хоногт бүргэгдсэн дуудлага мэдээллийн талаар мэдээллийг ЦХ-ээс танилцууллаа. Нийт 44 дуудлагаас гэмт хэргийн шинжтэй-14, зөрчлийн шинжтэй-30 дуудлага бүртгэгджээ. Мөн 13 хүн эрүүлжүүлэгдэж, 9 хүн жолоодох эрхээ хасуулсан байна. Түүнчлэн цахим орчинд иргэд онлайн худалдаа, залиланд өртөх магадлал өндөр байгааг тус хэлтсээс анхаарууллаа.
ДҮҮРГИЙН 2022 ОНЫ ТЭРГҮҮНИЙ МАЛЧИД ШАЛГАРЛАА
Дүүргийн ИТХ-ын ээлжит 22-р хуралдаан боллоо. Энэхүү хуралдааны шийдвэрүүдийг ИТХ-ын Зохион байгуулалтын хэлтсийн дарга Б.Соёл-Эрдэнэ танилцууллаа. Хуралдаанаар 2023 онд төлөөлөгчдийн хуралдаанаар хэлэлцэх асуудлын төлөвлөгөөг баталлаа. Мөн худалдан авах ажиллагааны үнэлгээний хороонд хөндлөнгийн гишүүнээр ажиллах А3 гэрчилгээтэй журамд заасан шалгуур хангасан 17 иргэн, дүүргийн 2022 оны Тэргүүний малчин”-аар дүүргийн 4 дүгээр хорооны малчин Цэцэгээгийн Энхтулга, 5 дугаар хорооны малчин Сономноржингийн Даваа нарыг шалгаруулж, 47 иргэнийг төрийн дээд шагналаар шагнуулахаар дэмжин уламжлах тогтоол гаргасан талаар танилцуулсан юм.
ЭРҮҮЛ МЭНДИЙН ТӨВД ХЭВТЭН ЭМЧЛҮҮЛЖ БУЙ ИРГЭДИЙН 50 ХУВИЙГ ХҮҮХДҮҮД ЭЗЭЛЖ БАЙНА
Дүүргийн ЭМТ-өөс өнөөдрийн байдлаар Улирлын томуу, томуу төст өвчин, ковидын нөхцөл байдлын мэдээллийг хүргэлээ. 02-р сарын 13-ны өдрийн байдлаар амбулаторийн үзлэгийн 11.3 хувь, 103 дуудлагын 47 хувь, ӨЭМ-ийн үзлэгийн 12.5 хувийг томуу томуу төст өвчин эзэлж байна.
Сар шинийн баяртай холбоотой томуу томуу төст өвчин өсөх магадлалтай тул амны хаалтыг тогтмол зүүж хэвших хэрэгтэй байгааг анхааруулсан юм. Иймд сар шинийн баярыг гэр бүлийн хүрээнд тэмдэглэхийг уриаллаа.
ЭНЭ САРЫН 16-НААС ЭХЛЭН ХҮЙТЭРНЭ
Цаг уурын өртөөнөөс ойрын өдрүүдийн цаг агаарын урьдчилан сэргийлэх мэдээллийг хүргэлээ. Энэ сарын 16-наас шөнөдөө -28-наас -33 хэмийн хүйтэн, өдөртөө -12-ноос -14 хэмийн хүйтэн байх төлөвтэй байна.
САР ШИНИЙН БАЯРЫН ӨДРҮҮДЭД ШУУРХАЙ АЖИЛЛАГААНЫ БРИГАД, ЖИЖҮҮРИЙН ХУВААРИЙГ ГАРГАН, ХЯНАЛТ ТАВЬЖ, БОЛЗОШГҮЙ ОСОЛ, АЛИВАА ЭРСДЭЛЭЭС УРЬДЧИЛАН СЭРГИЙЛЖ АЖИЛЛАХЫГ ҮҮРЭГ БОЛГОЛОО
Шуурхай зөвлөгөөний төгсгөлд дүүргийн Засаг дарга С.Даваасүрэн ирэх 14 хоногт хийж хэрэгжүүлэх ажлын үүрэг, даалгаврыг өгсөн юм.
-Сар шинийн баярыг угтсан үзэсгэлэн худалдааг 2-р сарын 5-наас эхлүүлэн Өргөө соёлын ордоны дотоод танхимд тавгийн идээ, бусад хүнсний болон ахуйн барааны худалдааг, Эм Жи төв /Сайн электроникс/-ийн гадна талбайд махны худалдааг зохион байгуулах,
-Гэр хорооллын алслагдсан хэсгийн хүүхдүүдэд зориулж, сургуулийн автобусыг дахин 2-оор нэмэгдүүлж, Хуцаа, сургалтын задгай, Рашаант, Жаргалант хэсгийн чиглэл, Хэрлэн, Байдлаг, Тогос-Уул, Их гүн, Бага гүн, Нарийн, Наран хэсгийн чиглэл, Хилчин, Замчин, Нугын тал, Талын толгой, Нарийн нуур чиглэл гэсэн маршрутыг гаргаж хүүхдүүдэд үйлчилгээг үзүүлэх бэлтгэлийг хангах,
-Тэрбум мод” үндэсний хөдөлгөөнийг эрчимжүүлэх зорилтын хүрээнд гэр хорооллын бүсийг “Ногоон бүс” болгох ажлыг зохион байгуулах төлөвлөгөөний төсөлд саналаа хэлэх,
-Иргэд, олон нийтийн амгалан тайван байдлыг хангаж, гал түймрийн аюул осол, гэмт хэрэг, зөрчилд өртөх болон зам тээврийн осол гэмтлээс урьдчилан сэргийлэх, замын хөдөлгөөний ачаалал ихтэй уулзваруудыг сайтар зохицуулж, хэрэгжилтэд хяналт тавьж ажиллах,
-Зах, худалдааны төвүүдэд хүнсний аюулгүй байдлыг хангаж, хяналт тавьж ажиллах,
-Баярын өдрүүдэд ажиллах эргүүл, жижүүр томилон ажиллуулж, Захирагчийн ажлын албанаас хяналт тавьж ажиллах,
-Инженерийн шугам сүлжээний хэвийн, найдвартай ажиллагааг хангаж, ус, дулаан, цахилгаан хангамжаар байгууллага, иргэдийг тасалдуулахгүй, гэнэтийн гэмтэл, саатал гарахаас урьдчилан сэргийлэх,
-Шуурхай ажиллагааны бригад, жижүүрийн хуваарийг гарган, хяналт тавьж, болзошгүй осол, аливаа эрсдэлээс урьдчилан сэргийлэх,
-Нийтийн эзэмшлийн гудамж талбайн тохижилт, хог хаягдлуудыг цэвэрлэх, тээвэрлэх ажлыг зохион байгуулж, хотын гудамж, талбайн гэрэлтүүлгийн асалтад хяналт тавьж ажиллах зэрэг үүрэг, даалгаврыг өглөө.
Өнөөдөр Багануур дүүрэг албан ёсоор байгуулагдсан өдөр
Налайхын районд харьяалалтай байсан Багануурын хороо захиргааг бие даасан Багануурын район болгохоор тухайн үеийн АИХТ-ийн Зарлиг гарснаар 1980 оны 2-р сарын 14-ний өдрийг Багануур дүүрэг албан ёсоор байгуулагдсан өдөр хэмээн үздэг. Б.Жамьянсүрэн гэдэг хүн БАГАНУУР гэдэг нэрийг өгч байжээ.
Их уурхайгаар овоглосон Багануурчууд та бүхэндээ Багануур дүүрэг үүсэн байгуулагдсаны түүхт 43 жилийн ойн мэндийг өргөн дэвшүүлье.
Спортын холбоо, клуб, салбар зөвлөлийн төлөөлөлтэй уулзлаа
Дүүргийн удирдлагууд үйл ажиллагаа явуулж буй спортын холбоо, салбар зөвлөл, клубийн төлөөлөлтэй уулзаж, санал солилцлоо. Уулзалтад 30 холбоо, салбар зөвлөл, клубийн 37 төлөөлөл ирсэн юм.
Уулзалтын эхэнд “2023 онд зохион байгуулагдах УАШТэмцээний төлөвлөгөө”, БТСХорооны 40 жилийн ойн нэрэмжит тэмцээн, Спортын салбарт хийгдсэн хөрөнгө оруулалт болон цаашид хийгдэх хөрөнгө оруулалт”-ын талаарх мэдээллийг хүргэлээ.
Ирсэн төлөөллүүд спортын салбарт тулгамдаж буй асуудал болон түүнийг шийдвэрлэх талаар саналаа илэрхийлсэн юм. Тодруулбал:
Энэ онд зохион байгуулагдах албан ёсны тэмцээн уралдааны хуваарийг холбоо, клубүүдэд мэдээлдэг байх, Спортын хууль, эрх зүйн талаар мэдээллийг тамирчдад өгдөг байх, спортын төрлийг нэмэгдүүлэх, Гадна спортын талбайг стандартад шилжүүлж, зарим гадаа талбайг өөр спортын талбай болгож, тохижуулах зэрэг санал хүсэлтийг илэрхийллээ.
Мөн спортын холбоо, клубүүдийг нэгдсэн зохион байгуулалтад оруулж, дээд шатны байгууллагад бүртгүүлж, албажуулах ажлуудыг зохион байгуулахаар боллоо.