Category : Мэдээ мэдээлэл

Дүүргийн төсвийн хөрөнгө оруулалтаар 4-р хорооны “Байдлаг” хэсгийн 1 дүгээр эгнээнд хүүхдийн тоглоомын талбайн тохижилтын ажлыг “ИГ” ХХК 09 сарын 09-ны өдрөөс хийж эхэлсэн.

Өнөөдрийн байдлаар тохижилтын ажил 90 хувийн гүйцэтгэлтэй үргэлжилж байна.

Тохижилтын ажлын хүрээнд ногоон байгууламж, элсний волейболын талбай, мини хөл бөмбөгийн талбай, сагсан бөмбөгийн талбай, гүйлтийн зам болон тоглоомуудыг байршуулаад байгаа бол гадна гэрэлтүүлэг, камержуулалтын ажлуудыг цаг агаар тогтуун байвал долоо хоногийн хугацаанд хийж дуусгахаар ажиллаж байгааг компанийн зүгээс танилцууллаа.

Дэлхийн Рэнжүгийн холбоо, Монголын Рэнжүгийн холбоо хамтран Япон улсын Элчин сайдын яам дэмжиж Рэнжүгийн өсвөрийн дэлхийн аварга шалгаруулах 13 дахь удаагийн тэмцээнийг 2024 оны 11 сарын 3-7-ны өдрүүдэд Улаанбаатар хотод зохион байгуулах гэж байна.

Энэхүү тэмцээнд Багануур дүүргийн Боловсрол, Гүн галуутай сургуулийн 1-4 дүгээр ангийн 6 тамирчин, дасгалжуулагч багшийн хамт оролцохоор бэлтгэл сургуулилтаа хийж эхэлжээ.

Оюуны спортын дэлхийн аварга шалгаруулах тэмцээнд дүүргээ төлөөлөн оролцохоор бүртгүүлсэн өсвөрийн тамирчдад дүүргийн Засаг дарга С.Даваасүрэн амжилт хүсэж, мөнгөн дэмжлэг үзүүлэхээ илэрхийллээ.

Ташрамд дурдахад Рэнжү нь хөлөгт тоглоом бөгөөд Япон улсаас үүсэлтэй оюуны спорт аж. Өсвөрийн дэлхийн аварга шалгаруулах тэмцээнийг 1996 оноос хойш 2 жилийн давтамжтай зохион байгуулж ирсэн бөгөөд 12 дахь удаагийн тэмцээн 2018 онд Турк улсад болсноос хойш корона цар тахлын улмаас завсарлаж энэ удаа Монгол улсад зохион байгуулагдахаар болжээ.

Оюуны спортын төлөөлөл болж Дэлхийн аваргад оролцох гэж буй тамирчдад амжилт хүсье.

Багануур дүүргийн ИТХ-ын төлөөлөгчид “Хөгжлийн бэрхшээлтэй хүний хөгжлийн төв”, “Теле камерын хяналтын дэд төв”-ийн үйл ажиллагаатай танилцлаа.

Дүүргийн хэмжээнд хөгжлийн бэрхшээлтэй 1100 гаруй иргэд байдаг бол үүнээс 173 хүүхэд байна. Тэдгээр иргэдийн боловсрол, эрүүл мэнд, хөдөлмөр эрхлэлт, нийгэм, сэтгэл зүйн хэрэгцээт үйлчилгээг авах зорилгоор “Хөгжлийн бэрхшээлтэй хүний хөгжлийн төв”-ийг төр захиргааны байгууллагаас өөрсдийн нөөц бололцоондоо тулгуурлан өнгөрсөн 09 сард ашиглалтад оруулж өнөөдрийн байдлаар тус төвөөр 100 гаруй иргэд төрийн үйлчилгээ авчээ.

“Ногоон бүс” төслийн хүрээнд иргэдийн аюулгүй, амар тайван амьдрах нөхцөлийг бүрдүүлэх, олон нийтийн аюулгүй байдлыг хангах, гэмт хэрэг, зөрчлөөс урьдчилан сэргийлэх зорилгоор дүүргийн хэмжээнд нийтийн эзэмшлийн гудамж, зам, талбайд суурилуулсан болон аж ахуйн нэгж, байгууллагын гадна орчны теле камерыг нэгдсэн сүлжээнд холбох, хяналт тавих чиг үүрэг бүхий “Теле камерын хяналтын дэд төв”-ийг байгуулсан.

Одоогийн байдлаар дэд төвийн засвар, тохижилт, серверийн тоног төхөөрөмжийн засвар, нийт камеруудыг шилэн кабельд холбож нэг цэгт төвлөрүүлэх зэрэг ажлууд хийгдэж байгаа ба ирэх 11 сарын 15 гэхэд дээрх ажлууд хийгдэж дуусах юм байна.

Нийслэлийн Эрүүл Мэндийн Газраас 2017 оноос эхлэн жил бүр “Сайн туршлага” арга хэмжээг зохион байгуулж ирсэн бөгөөд энэ жил 8 дахь удаагийн шалгаруулалт боллоо.

Энэ удаагийн арга хэмжээнд Багануур Эрүүл мэндийн төвийн 20 бүтээл өрсөлдсөнөөс 2-р шатанд 12 бүтээл шалгарч үүний 3 бүтээл нь амжилт үзүүлсэн байна. Үүнд:

Шинээр нэвтрүүлсэн оношилгоо технологийн хэрэгжилтийн үр дүн төрөлд: Багануур эрүүл мэндийн төвийн Төрөлжсөн тусламж үйлчилгээний тасгийн эмч Л.Чимэдлхам, эмч С.Байгалмаа нар “24 цагийн зүрхний цахилгаан бичлэг” сэдэвт бүтээлээр – ДЭД байр

Шинээр нэвтрүүлсэн эмчилгээний төрөлд: Багануур эрүүл мэндийн төвийн гэмтлийн эмч Э.Мөнхсүх “Өвдөгний үе солих мэс заслыг sub vastus хүрцээр хийсэн мэс заслын эмчилгээний үр дүн” сэдэвт бүтээлээр-ТУСГАЙ байр

Шинээр нэвтрүүлсэн үйлчилгээний технологи төрөлд: “Багануур эрүүл мэндийн төвийн хавдар, хөнгөвчлөх-хими эмчилгээний тасгийн бүтэц, зохион байгуулалт” сэдэвт бүтээл нь ШИЛДЭГ БҮТЭЭЛ-ээр тус тус шалгарч оролцогч 9 бүтээл БАТЛАМЖ-аа гардан авчээ.

Нийт оролцсон эмч сувилагч нартаа баяр хүргэж, эрдэм шинжилгээ, судалгааны ажилд нь өндөр амжилт хүсье

Монголын Волейболын холбооноос 10 сарын 21-27-ны өдрүүдэд 2024 оны Өсвөр үеийн улсын аварга шалгаруулах тэмцээнийг “Эерэг эрчим нэмье” уриан дор Буянт-Ухаа спорт цогцолборт зохион байгуулагдлаа.

Энэ удаагийн тэмцээнд хөвгүүдийн 99 баг, охидын 77 баг, нийт 176 багийн 2160 тамирчин, 350 гаруй дасгалжуулагч багш нар 7 хоногийн турш хурд хүч, авхаалж самбаагаа сорин өрсөлдсөн юм.

Багануур дүүргээс хөвгүүдийн 2, охидын 2 баг тус тэмцээнд оролцож дасгалжуулагч Б.Хатанзориг, Г.Төгөлдөр туслах дасгалжуулагчтай “Багануур баг” шилдэг дөрөвт шалгарлаа.

Дүүргээ төлөөлж улсын аваргад амжилттай оролцсон өсвөрийн баг тамирчид, дасгалжуулагчдадаа баяр хүргэж, цаашдын тэмцээн уралдаанд нь амжилт хүсье.

Монгол Улсад Статистикийн алба үүсэж, бэхэжсэний 100 жилийн ойг тохиолдуулан “Нээлттэй хаалганы өдөрлөг”-ийг зохион байгууллаа.

Энэ үеэр статистикийн байгууллагын үйл ажиллагаа, шинэчлэл, онцлогийн талаар иргэд болон байгууллага аж ахуйн нэгжийн албан хаагчид, мэдээлэгч байгууллагуудад танилцуулсан юм.

Мөн статистикийн бүтээгдэхүүн, үйлчилгээг хэрхэн ашиглах талаар танилцуулахаас гадна дүүргийн статистикийн хэлтсийн үйл ажиллагаа, онцлогийн хүрээнд хэрэглэгчдэд дэлгэрэнгүй мэдээлэл өглөө.

Тухайлбал, Статистикийн мэдээллийн нэгдсэн сангаас (www.1212.mn) сонирхсон мэдээллээ дэлгэрэнгүй байдлаар авах, Төрийн нэгдсэн өгөгдлийн сан болон Төрийн мета өгөгдлийн сангийн талаар, иргэд болон ААНБ-аас түүврээр судалгаа авах нь ямар зорилго ач холбогдолтой талаар, иргэд мал тооллого болон бусад өрхийн мэдээллийг төрийн шуурхай үйлчилгээнээс хэрхэн авахыг танилцууллаа.

Нийслэлийн Засаг дарга бөгөөд Улаанбаатар хотын захирагчийн нэрэмжит өсвөрийн шатарчдын хоёрдугаар шат буюу дүүргийн аварга шалгаруулах “Их нүүдэл” тэмцээнийг Багануур дүүргийн ЗДТГ, Боловсролын хэлтэс, “Төр Монгол” шатрын клуб, Гүн галуутай сургууль хамтран зохион байгууллаа.

Энэ удаагийн тэмцээнд нэгдүгээр шат буюу сургуулийн аваргаас шалгарсан 1-12 дугаар ангийн 24 гишүүнтэй холимог багийн шилдэг 96 шатарчид оюун ухаанаа уралдааллаа.

Тэмцээний тэргүүн байр эзэлж “Цом” 500.000 төгрөгийн шагналаар Б.Ариунтуяа дасгалжуулагчтай Боловсрол сургуулийн баг тамирчид, дэд байр эзэлж “Цом” 400.000 төгрөгийн шагналаар Д.Ганхуяг дасгалжуулагчтай Гүн галуутай сургуулийн баг тамирчид шалгаран Нийслэлийн аварга шалгаруулах тэмцээнд оролцох эрхээ гардан авлаа.

Энэ сарын 28-ны өдөр зохион байгуулагдах Нийслэлийн аварга шалгаруулах шигшээ тэмцээнд оролцох баг тамирчдадаа амжилт хүсье.

Монголын Волейболын холбооноос 10 сарын 21-27-ны өдрүүдэд 2024 оны Өсвөр үеийн улсын аварга шалгаруулах тэмцээнийг “Эерэг эрчим нэмье” уриан дор Буянт-Ухаа спорт цогцолборт зохион байгуулж байна.

Энэ удаагийн тэмцээнд хөвгүүдийн 99 баг, охидын 77 баг, нийт 176 багийн 2160 тамирчин, 350 гаруй дасгалжуулагч багш нар 7 хоногийн турш хурд хүч, авхаалж самбаагаа сорин өрсөлдөнө.

Багануур дүүргээс хөвгүүдийн 2, охидын 2 баг тус тэмцээнд оролцож байгаа юм.

Дүүргээ төлөөлж улсын аваргад оролцож буй өсвөрийн баг тамирчид, дасгалжуулагчдадаа амжилт хүсье.

Тэгш хүртээмжтэй боловсролыг хүүхэд бүрд хүргэх зорилгоор Мобиком групп нь 2023 онд алслагдсан сумд, хотын захын нийт 8 сургуульд иж бүрэн дижитал танхим тохижуулан өгч, 12,500 гаруй сурагч төслийн үр шимийг хүртжээ.

Төсөлд хамрагдсанаар сурагчдын сургалтын амжилтад онцгой сайн нөлөөлсөн үр дүн гарсан тул 2024 онд төслөө үргэлжлүүлж, дараагийн сургуулиуддаа дижитал танхимыг байгуулж байгаа аж.

Хамгийн сүүлийн үеийн цоо шинэ тоног төхөөрөмжүүд, өндөр хурдны интернэт бүхий иж бүрэн дижитал танхимтай болох 6 сургуулийг мобикомын 14,000 хэрэглэгчийнхээ саналд үндэслэн шалгаруулсан. “Smart Education 4” төслийн хүрээнд төсөлд хамрагдсан 6 сургуулийн нийт 50 хүүхдийг салбар, салбарын шилдэг 10 мэргэжилтэн хагас жилийн хугацаанд менторлох юм.

Ингэснээр сурагчид маань тохижуулан өгсөн дижитал ангийг хичээлийн хөтөлбөрөөс гадна хувь хүний хөгжил, карьер төлөвлөлтийн хүрээнд ашиглах боломж бүрдэж байгаа юм.

Гүн галуутай сургуулийг дэмжиж саналаа илгээсэн мобикомын хэрэглэгчдэдээ баярлалаа.