Өнөөдөр Зулын 25-ны Их дүйчэн өдөр
“БОГД ЗОНХОВА” бурхны Зулын 25-ны их дүйчэн өдрөөр Багануур дүүргийн “ГҮНДҮ ЁНДОН РАВЖААЛИН” хийдээс зохион байгуулах хурал номын болон нийтэд үйлдэх буяны арга хэмжээний хөтөлбөрийг хүргэж байна.
9:00 цагаас “Богд лам”-ын чого хурна
13:00 цагаас “Богд Зонхова бурхан”-ны магтаал ерөөл хурна
17:00 цагаас “Дүнчүүр” маань хөгжөөнө
18:00 цагаас 1080 зул өргөх ёслол болно
18:30 цагаас “Лүйжин” хурна
ЗУЛЫН 25-ны их дүйчэн өдөрБурхны шашинт улс орнууд түүний дотор монголчууд өвлийн тэргүүн сарын 25-ны өдрийг ”Зулын 25″ буюу “Богд ламын их дүйчэн” өдөр хэмээн олон зуун жил тэмдэглэж бурхны шашны орон хийдүүд мянган тахилын зул хүж өргөж, их ерөөл хурдаг уламжлалтай. Монголчууд Богд Зонхобын дүйчэн өдөр болохоос өмнө үүц махаа бэлтгэж гүйцээд зулын хорин таван тохиох үед тэдгээр амьтдыг сайн төрөлд олуулах, мөн өөрсдийн санаатай болон санаандгүй үйлдсэн нүгэл хилэнцийг наманчлах, нас болсон хүмүүстэй болон эх болсон зургаан зүйлийн хамаг амьтны тусын тулд буянд шамдан өргөдөг. “Зулын 25”-ны билэгт сайн өдөр зул өргөхдөө: “Ум зула зула бара бара зула суухаа” тарнийг уншин зул өргөх ёс жаягийн дагуу зулаа өргөвөөс зохимжтой. Мөн Богд ламын магтаал залбирал “Мигзэм” олонтаа уншиж Богд ламыг сэтгэлдээ бодох бөгөөд ЖАНРАЙСИГ, МАНЗУШИР, ОЧИРВААНЬ бурхдаас аврал одуулж наманчлан залбирдаг.
“UB CAB” онлайн такси үйлчилгээ Багануурт үйл ажиллагаагаа эхлүүллээ
Багануур дүүрэгт “UBCab” такси үйлчилгээ өнөөдөр нэвтэрч нээлтээ хийж энэ үеэр хувиараа такси үйлчилгээ эрхлэгч жолооч нар оролцож, UBCab такси дуудлагын үйлчилгээнд жолоочоор хэрхэн бүртгүүлэх, яаж ажиллах талаар заавар зөвлөгөөг компанийн сургагч багш нараас авлаа.
Жолоочийн бүртгэл хурдан системээр баталгааждаг тул орон нутгийн жолооч нар салбарт биеэр очих шаардлагагүй, онлайнаар бүртгүүлэх боломжтой юм.
“UBCab” онлайн такси үйлчилгээ нэвтэрснээр зөвхөн машин дуудахаас гадна дуудлагын жолооч, шуурхай хүргэлт зэрэг үйлчилгээг давхар авах боломж нээгдэж байгаагаараа онцлогтой.
Хээрийн их цэвэрлэгээнд 117 иргэнийг түр ажлын байраар хангалаа
Дүүргийн хэмжээнд нийтийн эзэмшлийн гудамж, зам, талбай, гуу жалганд үүссэн хог хаягдлыг цэвэрлэх, хуримтлагдсан хог хаягдлыг ачиж, тээвэрлэх, хөдөлмөрийн насны ажилгүй иргэдийг түр ажлын байраар хангах зорилгоор “Бүх нийтийн хээрийн их цэвэрлэгээ”-г гурван өдрийн хугацаанд зохион байгууллаа.
Тус цэвэрлэгээг Хөдөлмөр, халамжийн үйлчилгээний хэлтэс болон хороодтой хамтран хөдөлмөрийн насны 117 иргэнийг түр ажлын байраар хангаж, 38 байршлын 29000 м2 талбайгаас 69,4 тонн хог хаягдлыг цэвэрлэжээ.
Багануурын алдарт эхчүүд 3-р байранд шалгарчээ
Зөв гэр бүл-Зөв хүүхэд-Зөв нийгэм” уриан дор ээжүүдэд эрүүл аж төрөх зан үйлийг хэвшүүлэх, идэвхтэй хөдөлгөөн, спортоор хичээллэх боломжийг нэмэгдүүлэх, олимпизмыг түгээн дэлгэрүүлэх зорилгоор жил бүр уламжлал болгон зохион байгуулдаг “Алдарт Эх-2024” Спортын VI наадам 2024 оны 11-р сарын 02-17 өдрүүдэд -Багануур хот, -Үндэсний цэцэрлэгт хүрээлэн, -Уран ган спорт цогцолборт тус тус зохион байгуулагдаж өндөрлөлөө.
Зургаа дахь жилдээ зохион байгуулагдаж буй тус наадам 2024 онд Багануур багийн нэрэмжит болгон зохион байгуулагдсан юм. Спортын VI наадам шатар, дартс, ширээний теннис, сагсан бөмбөг, волейбол, боулинг, кросс гүйлт гэсэн спортын 7 төрлөөр 15 багийн 500 гаруй одонтой ээжүүд өрсөлдлөө.
Спортын VI наадамд (-39 нас, 40+ нас) насны ангиллаар “Алдарт эх цахим нэгдэл”-ийн гишүүн эмэгтэйчүүд оролцсон ба Багануурын ээжүүд дараах амжилтуудыг гаргажээ.
-Волейболын +40 ангилалд Ж.Майннэгэн ахлагчтай баг тамирчид 2-р байр эзэлж мөнгөн медаль
-Сагсан бөмбөгийн +40 ангилалд Т.Эрдэнэбулган ахлагчтай баг тамирчид 1-р байр эзэлж алтан медаль
-Сагсан бөмбөгийн төрөлд шилдэг тоглогч Т.Эрдэнэбулган
-Боулингийн төрөлд Б.Цэцгээ ахлагчтай баг тамирчид 1-р байр эзэлж алтан медаль
-Боулингийн төрөлд шилдэг тоглогч Л.Оюунбаяр
-Ширээний теннисний +40 ангиллын ганцаарчилсан төрөлд Б.Батцэнгэл 2-р байр эзэлж мөнгөн медаль тус тус хүртсэнээр багийн дүнгээр 15 багаас 3-р байрыг эзэлсэн амжилт үзүүлжээ.
Дүүргийн спортлог алдарт эхчүүддээ баяр хүргэе.
Багануурын олс таталтын эмэгтэй баг тэргүүн байр эзэлжээ
Нийслэлийн иргэдийн спортын наадмын Олс таталтын шигшээ тэмцээнд өнгөрсөн хугацаанд дүүргийн 1-р хорооны эмэгтэй баг тамирчид 5 удаа шагналт байрт шалгарч байсан.
Тэгвэл энэ удаагийн XII наадмын шигшээ тэмцээнд Б.Баттулга дасгалжуулагчтай Б.Наранцэцэг ахлагчтай 1-р хорооны баг тамирчид нэгдүгээр байр эзэлсэн амжилт гаргажээ.
Баг тамирчдад баяр хүргэе.
Их зохиолч Д.Нацагдоржийн мэндэлсний 118 жилийн ой тохиож байна
Монголын шинэ үеийн утга зохиолыг үндэслэгч, Их зохиолч Д.Нацагдорж 1906 оны 11-р сарын 17-ны өдөр одоогийн Төв аймгийн Баяндэлгэр сумын Гүн галуутай хэмээх газар мэндэлжээ.
Их зохиолчийн мэндэлсний 118 жилийн ойг тохиолдуулан түүний хөшөөнд цэцэг өргөж, “Миний хэнз хурга” хүүхдийн уран уншлагын уралдааныг зохион байгуулж өндөрлөсөн бол 15.00 цагаас “Миний нутаг” шүлгийн нэрэмжит яруу найргийн наадам Соёлын ордонд болох тул Багануурчууд та бүхнийг хүрэлцэн ирж үзэхийг урьж байна.
Хүн ам нийгмийн салбарынхан анх удаа команд штабын сургуулилтыг хийж байна
Монгол Улсын Шадар сайдын баталсан бодлого, төлөвлөгөөний дагуу Онцгой байдлын ерөнхий газраас Хүн ам, нийгмийн хамгааллын улсын албанд зохион байгуулж байгаа /Гэр бүл, хөдөлмөр, нийгмийн хамгааллын яам/ гамшгаас хамгаалах команд штабын сургууль өнөөдөр эхэллээ.
Хүн ам, нийгмийн хамгааллын улсын алба нь 48 цагийн турш газар хөдлөлтийн гамшгийн үед хэрхэн ажиллах, ямар бэлтгэл бэлэн байдлыг хангах талаарх дадлага сургуулилалтыг хийх юм.
Дадлага сургуулилтад Гэр бүл, хөдөлмөр хамгааллын яам, Нийгмийн даатгалын ерөнхий газар, Хөдөлмөр, халамж үйлчилгээний ерөнхий газар, Хүүхэд, гэр бүлийн хөгжил хамгааллын ерөнхий газар, Хөгжлийн бэрхшээлтэй хүний хөгжлийн ерөнхий газар, Хөдөлмөр, нийгмийн хамгааллын сургалт, үнэлгээ, судалгааны институт, Хөдөлмөрийн аюулгүй байдал, эрүүл мэндийн төв болон 21 аймаг, 9 дүүргийн бүтцийн нэгжүүдийн нийт 400 гаруй ажилтан, алба хаагч оролцож байна.
Жил бүр өсөн нэмэгдэж байгаа гамшгийн аюулаас урьдчилан сэргийлэх, учирч болзошгүй эрсдэлийг бууруулах, гамшгаас хамгаалах үйл ажиллагаанд олон нийтийн оролцоог хангах, энэ чиглэлээр иргэд, олон нийтэд мэдлэг ойлголт олгох сургалт, сурталчилгааг тогтмол зохион байгуулах шаардлага бий болсоор байна. Судалгаанаас харахад гамшигт өртөж амь насаа алдагдсдын ихэнх хувийг хүүхэд, эмэгтэйчүүд, хөгжлийн бэрхшээлтэй иргэд эзэлж байна.
Анх удаа улсын албанд буюу Хүн ам, нийгмийн хамгааллын улсын салбарын хэмжээнд дадлага сургуулийг зохион байгуулж байгаа гэдгээрээ энэ сургуулилалт онцлог.
Гамшгаас хамгаалах хүн ам, нийгмийн хамгааллын улсын алба /ГБХНХЯ/ гамшгаас хамгаалах төлөвлөгөөг тодотгох, бие бүрэлдэхүүний бэлтгэл бэлэн байдал, удирдах бүрэлдэхүүний шийдвэр гаргах, цагийн байдлыг үнэлэх, гамшгийн үед ажиллах ур чадварыг дээшлүүлэх, шуурхай штабын үйл ажиллагаа, харилцан ажиллагааг тодорхойлох зорилготой юм.
Боловсролын сургалтын байгууллагын орчинд электрон тамхи хэрэглэхийг хориглолоо
ДЭМБ-аас хийсэн судалгаагаар электрон тамхи /vape/-ны хэрэглээ нь хүний тархины үйл ажиллагаанд урт хугацаанд сөргөөр нөлөөлж, эрүүл мэнд, амь насанд нь аюул, эрсдэл учруулж, сэтгэл түгших эмгэг, оюуны хомсдол, донтолт, уушги цоорох эмгэг зэргийг үүсгэж буй нь тогтоогджээ.
Ялангуяа өсвөр насандаа электрон тамхи хэрэглэсэн хүүхэд утаат тамхи, никотинд донтох эрсдэл эрс нэмэгддэг байна. Иймд Боловсролын сайдын 2024 оны “Боловсролын сургалтын байгууллагын орчинд электрон тамхи хэрэглэхийг хориглох тухай” тушаал гарлаа.
Үүнтэй холбогдуулан доор дараах арга хэмжээг авч хэрэгжүүлэхийг өмчийн хэлбэр үл харгалзан бүх түвшний боловсролын сургалтын байгууллагын эрхлэгч, захирал, ректор нарт үүрэг болгов. Үүнд:
Суралцагчийн өөрийн удирдлагын байгууллага, холбогдох төрийн болон төрийн бус байгууллагатай хамтран электрон тамхины хор уршиг, эрүүл мэндэд үзүүлэх хор нөлөөний талаар ойлголт, мэдээлэл өгөх сургалт, нөлөөллийн арга хэмжээг насны онцлогт тохируулан тогтмол зохион байгуулах;
Электрон тамхи хэрэглэдэг суралцагчтай ганцаарчилсан уулзалт зохион байгуулах, сэтгэл зүйн зөвлөгөө, үйлчилгээнд хамруулахад эрүүл мэндийн байгууллагатай хамтран ажиллах;
Сургалтын байгууллагын дүрэм, дотоод хэм хэмжээнд сургуулийн орчинд электрон тамхи хэрэглэхийг хориглосон зохицуулалт тусгах.
Мөн эцэг эх, асран хамгаалагч, харгалзан дэмжигчдийг хүүхдэдээ тавих хараа хяналтаа сайжруулах, электрон тамхины хор нөлөө, эрүүл мэндэд учрах эрсдэлийн талаар ярилцаж, ойлгуулахыг уриалж байна.