Халх голын байлдааны ялалтын 85 жилийн ойн хүрээнд “Дурсамж цаг хугацаанаас үнэтэй” уриан дор явагдаж буй Монгол улс, ОХУ-ын тойрон аялагчдыг Хилийн цэргийн 0252 дугаар ангид хүлээн авлаа. Энэхүү хамтарсан аялал нь 6 дахь удаагаа явагдаж байгаа бөгөөд энэ жилийн аялалд ОХУ-ын залуу үеийн төлөөллүүд Эрхүү-Халхын гол хүртэл аялна. Аяллын зорилго нь Халх голын байлдааны ялалт нь асар их үнэ цэнээр бий болсон төдийгүй дэлхий дахинд Монгол Улсын тусгаар тогтнолыг хүлээн зөвшөөрүүлэхэд үнэлж баршгүй хувь нэмэр оруулсныг өнөө цагийн хүүхэд, залуучуудад ойлгуулах тэднийг эх оронч үзлээр хүмүүжүүлэхэд оршиж байгаа юм.
Онцгой байдлын хэлтэст өнгөрсөн хугацаанд 6 дуудлага ирсэн бөгөөд үер усны аюулаас 5 хүний амь, 20 сая төгрөгийн хөрөнгийг авран хамгаалжээ. Мөн Засаг даргаас өгсөн “Үер усны аюулаас урьдчилан сэргийлэх ажлыг эрчимжүүлэх, далан сувгийн үзлэг шалгалтыг тогтмол явуулах” үүрэг даалгаврын хүрээнд үер усны далан суваг шугам, инженерийн байгууламжид үзлэг шалгалтыг зохион байгуулсан байна.
Цагдаагийн хэлтэст өнгөрсөн 14 хоногийн хугацаанд нийт 78 дуудлага бүртгэгдсэнээс гэмт хэргийн шинжтэй 26 дуудлага бүртгэгджээ. Гэмт хэргийн шинжтэй нийт дуудлагын 38.4 хувийг залилах төрлийн гэмт хэрэг эзэлж, сүүлийн үед энэ төрлийн гэмт хэрэг өсөж байгааг анхаарууллаа. Тодруулбал дүүргийн хэмжээнд өнгөрсөн 14 хоногт 12 иргэн 31.137.000 төгрөг залилуулж хохирчээ. Цахим залилангаас урьдчилан сэргийлэхийг тус хэлтсээс анхааруулж байна.
Дээрх мэдээллийн дараагаар Эрүүл мэндийн төвөөс Улаан бурхан өвчний талаар сэрэмжлүүлэг мэдээ хүргэж, тус өвчнөөс сэргийлэхийн тулд хүүхэд бүрийг 9 сартайд, 2 настайд нь дархлаажуулалтад бүрэн хамруулах, тухайн үед хоцорсон хүүхдийг нөхөн дархлаажуулалтад хамруулж байгааг мэдээллээ.
Ногоон бүс зорилтын хүрээнд иргэдийн аюулгүй, ая тухтай амьдрах орчныг бүрдүүлэх, гэмт хэрэг зөрчлөөс урьдчилан сэргийлэх, гэмт хэргийн гаралтыг бууруулах зорилгоор дүүргийн хэмжээнд камерын хяналтын дэд төвийг байгуулж эхний ээлжинд Цагдаагийн хэлтэст бүртгэлтэй байсан 53 хяналтын камерийг ЗДТГ-ын Камерын хяналтын дэд төврүү нүүлгэн шилжүүлж, шилэн кабельд холбосон байна. Энэ ондоо багтаан бүрэн ажиллагаанд оруулахаар төлөвлөн ажиллаж байгаа талаар тус төвийн дарга Ц.Батбуян мэдээллээ.
Төлөвлөгөөт мэдээллийн дараагаар Засаг даргаас ирэх 14 хоногт дараах ажлуудад анхаарч ажиллахыг үүрэг болголоо.
Багануур дүүргийн Онцгой байдлын хэлтэст өнгөрсөн 14 хоногийн хугацаанд иргэдийг гол, мөрний орчимд амрах, зугаалах үедээ бага насны хүүхдэд тавих хараа хяналтыг сайжруулах, иргэдийн сонор сэрэмжийг дээшлүүлэх, усанд осолдохоос урьдчилан сэргийлэх зорилгоор урьдчилан сэргийлэх ажлыг зохион байгуулан гол, усны ослоос урьдчилан сэргийлэх, сэрэмжлүүлэг зөвлөмж өгч завьт болон хөдөлгөөнт эргүүлийг зохион байгуулан ажиллажээ.
