Category : Онцлох

Дүүргийн удирдах ажилтны ээлжит шуурхай хуралдаан өнөөдөр болж, дүүргийн Засаг даргын орлогч Б.Балжинням удирдан явуулав. Өмнөх шуурхай зөвлөгөөнөөр дүүргийн Засаг дарга 9 чиглэлээр үүрэг, даалгавар өгснөөс хэрэгжилт 94% хувьтай байсныг ЗДТГ-ын  ТЗУХ-ийн дарга Б.Туяа танилцууллаа.

БАГАНУУР ДҮҮРЭГ ДЭХ ЦАГДААГИЙН ХЭЛТЭСТ 47 ДУУДЛАГА БҮРТГЭГДЖЭЭ

Өнгөрсөн 14 хоногт бүргэгдсэн дуудлага мэдээллийн талаар мэдээллийг ЦХ-ээс танилцууллаа.

Нийт 47 дуудлагаас гэмт хэргийн шинжтэй-14, зөрчлийн шинжтэй-33 дуудлага бүртгэгджээ. Мөн 12 хүн эрүүлжүүлэгдэж, 9 хүн жолоодох эрхээ хасуулсан байна. Цагдаагийн хэлтсээс дүүргийн нутаг дэвсгэрт бусдын хөдөлгөөнт саад учруулан түр буюу удаан зогсохыг хориглосон газар зогссон, эсрэг урсгал сөрсөн тээврийн хэрэгслүүдэд хяналт тавьж илэрсэн зөрчлийг арилгуулан дахин зөрчил гаргахгүй байх талаар анхааруулга, санамж өгч ажилласан байна. 

ГАЛ ТҮЙМРИЙН 1 ДУУДЛАГА БҮРТГЭГДЭВ 

Өнгөрсөн 14 хоногийн хугацаанд Онцгой байдлын хэлтэст гал түймрийн 1 дуудлага бүртгэгдсэн байна. Үндэсний аюулгүй байдлын зөвлөл, Шадар сайдын ажлын алба, Онцгой байдлын ерөнхий газартай хамтран стратегийн команд штабын сургууль, Гал унтраах техникийн олон төрөлт спортын Улаанбаатар бүсийн “Гандуулга’ клубийн 2023 оны аварга шалгаруулах тэмцээнийг Багануур дүүрэгт амжилттай зохион байгуулан ажилласан байна.

Мөн гол, мөрөн нуурын ойролцоо амарч зугаалахдаа сонор, сэрэмжтэй байх, 

-Гэр бүл найз нөхөд, хамт олноороо амралт зугаалгаар явахдаа нэгдсэн зохион байгуулалттай, нэгнийгээ бүртгэдэг байх,

-Хүүхдийг гол горхи, нуур, цөөрөм рүү хараа хяналтгүй явуулж тоглуулахгүй байх

-Согтууруулах ундаа хэрэглэсэн үедээ гол усанд орохгүй байх,

-Булчин, шөрмөс татах үед гол усанд орохоос татгалзах,

-Түргэн урсгалтай гүнзгий голын усанд сэлэхээс зайлсхийх,

-Гол горхи, нуурын ус гатлахдаа зориулалтын гарам, гүүрээр гарах,

-Голын эрэг дагуу байрласан аюулгүй байдлын сануулга, самбаруудыг анхаарч аюулгүй байдлаа хангах, гол, усны ослоос урьдчилан сэргийлэхийг Онцгой байдлын хэлтсээс анхаарууллаа.

МАЛЧДЫН ӨДӨРЛӨГ ЗОХИОН БАЙГУУЛНА

ИТХ-ын нарийн бичгийн дарга бөгөөд ажлын албаны дарга Г.Гансэлэм ирэх 7 хоногт буюу 06-р сарын 26-наас 28-ний өдрүүдэд дүүргийн 5 хорооны малчдын өдөрлөгийг зохион байгуулах гэж байгаа талаар танилцуулсан юм.

Тухайлбал 06-р сарын 26-ны өдрийн 11:00 цагт 1,2-р хорооны иргэдтэй Хадан хошуу, 06-р сарын 27-ны өдөр 11:00 цагт 3, 5-р хорооны иргэдтэй Жаргалант, Хэрлэн гүүр, 06-р сарын 28-ны өдөр 11:00 цагт 4-р хорооны иргэдтэй Холбоо толгойд уулзахаар бэлтгэл ажлын хангаад байгаа юм байна. Энэ үеэр малчдад мэдээ, мэдээлэл өгөх, санал хүсэлтийг хүлээн авч сонсох, төрийн үйлчилгээг нэг цэгээс үзүүлэх, эмийн худалдаа, мал эмнэлэг, эрүүл мэнд, үсчин, гоо сайхан гэх мэт үйлчилгээнүүдийг хүргэж ажиллах юм.

МАЛ АЖ АХУЙ ЭРХЛЭХИЙГ ХОРИГЛОХ БҮСЭЭС МАЛТАЙ ИРГЭДИЙГ ГАРГАНА

Шуурхай зөвлөгөөний төгсгөлд дүүргийн Засаг даргын орлогч Б.Балжинням ирэх 14 хоногт хийж хэрэгжүүлэх ажлын үүрэг, даалгаврыг өгсөн юм.

• Үндэсний их баяр наадмыг зохион байгуулах бэлтгэл ажлыг сайтар хангаж, холбогдох байгууламжуудын засвар үйлчилгээ, стандартыг дагуу тохижилтын ажлыг чанартай гүйцэтгэж ажиллах.
• Манай хороо миний гудамж аяны хүрээнд хийх ажлуудаа эрчимжүүлэх, олон нийтэд мэдээлэж ажиллах,
• НИТХ-ын 2019 оны 21/06 дугаар тогтоолын хэрэгжилтийг хангаж, нийслэлийн мал аж ахуй эрхлэхийг хориглох бүсээс малтай иргэдийг гаргах ажлыг тогтмол зохион байгуулах.
• Засгийн газрын 2022 оны 340 дүгээр тогтоолын хүрээнд автомашины зогсоолууд, нийтийн бие засах газрууд, үерийн далан сувгийн цэвэрлэгээ, төвлөрсөн гурван хогийн цэгийн менежментийн асуудлуудыг хувийн хэвшлээр гүйцэтгүүлэх ажлын тендерийг зарлаж, гэрээний төслийг боловсруулж ажиллах.
• Нийслэлийн Засаг даргын 2023 оны А/490 дүгээр захирамжийн дагуу 40 байршилд 3х3 сагсан бөмбөгийн талбай байгуулах ажлыг эрчимжүүлж ажиллах зэрэг үүрэг өгсөн юм.

Дүүргийн удирдах ажилтны ээлжит шуурхай хуралдаан өнөөдөр болж, дүүргийн Засаг дарга удирдан явуулав. Өмнөх шуурхай зөвлөгөөнөөр дүүргийн Засаг дарга 10 чиглэлээр үүрэг, даалгавар өгснөөс хэрэгжилт 86.5% хувьтай байсныг ЗДТГ-ын  ТЗУХ-ийн дарга Б.Туяа танилцууллаа.

ЗАРЛАН МЭДЭЭЛЛИЙН ДОХИОГООР НҮҮН ШИЛЖИХ ДАДЛАГА СУРГУУЛИЙГ ЭНЭ САРЫН 8-НЫ ӨДРИЙН 16:00 ЦАГТ ЗОХИОН БАЙГУУЛНА

Үндэсний аюулгүй байдлын зөвлөл, Шадар сайдын ажлын алба, Онцгой байдлын ерөнхий газар, Нийслэлийн Засаг даргын тамгын газар хамтран энэ сарын 7-9-ний өдрүүдэд стратегийн команд штабын сургуулийг зохион байгуулахтай холбогдуулан Онцгой байдлын хэлтсийн дарга Г.Батжаргал удирдлагуудад мэдээлэл хүргэлээ.

Стратегийн команд штабын сургууль 06-р сарын 07-нд эхэлж, гурван өдөр үргэлжлэнэ. Тус сургуулийн гол зорилго нь газар хөдлөлтийн гамшиг тохиолдсон үед төрийн байгууллага, цэргийн байгууллагууд хоорондын хамтын ажиллагаа, бүх шатны төлөвлөлтийн бичиг баримтыг шинэчлэх юм. Гамшгийн голомтод үүрэг гүйцэтгэх, олон улсын жишиг загварыг нэвтрүүлэх, турших, ослын удирдлагын тогтолцоо, баг бүрэлдэхүүний сургуулилалт зохион байгуулах юм байна.

Зургадугаар сарын 8-ны өдөр улс даяар 16:00 цагт зарлан мэдээллийн дохиогоор иргэд нүүн шилжих дадлага сургуулийг зохион байгуулна.

Орон гэрээсээ, байгаа газраасаа аюулгүй газарт шилжин очих дадлага сургуулийг хийх, газар хөдлөлтийн аюул тохиолдсон үед ямар хүндрэлүүд учрах, түүнийг хэрхэн шийдэх, нэрвэгдсэн хүмүүсийг нүүлгэн шилжүүлэх, хоол хүнсээр хангах зэрэг практик дээр учрах хүндрэлийг даван туулах дадлага сургуулийг хийх юм байна.

ХӨРӨНГӨ ОРУУЛАЛТЫН АЖЛАА ЭРЧИМЖҮҮЛНЭ

Шуурхай зөвлөгөөний төгсгөлд дүүргийн Засаг дарга С.Даваасүрэн ЭМТ-ийн хөнгөвчлөх тасагт нэн шаардлагатай байгаа тоног төхөөрмж, засвар, тохижилтод БААН-үүдээ хамтран ажиллахыг уриалаад ирэх 14 хоногт хийж хэрэгжүүлэх ажлын үүрэг, даалгаврыг өгсөн юм. Тухайлбал:

• Зургаадугаар сарын 7-9-нд зохион байгуулах “Нийслэл Улаанбаатар хотод газар хөдлөлтийн гамшиг тохиолдож, онц байдал тогтоосон үеийн төрийн байгууллагуудын харилцан хамтын ажиллагаа” сэдэвт стратегийн команд штабын сургуульд нийт байгууллагууд идэвхтэй оролцох.
• Үндэсний их баяр наадмыг зохион байгуулах бэлтгэл ажлаа бүх шатандаа эрчимжүүлж, авто зам, явган хүний замын засвар, шинэчлэл, нийтийн эзэмшлийн гудамж, зам, талбайн тохижилт, ногоон байгууламжийг нэмэгдүүлж, ажлын гүйцэтгэл, чанар, стандартад сайтар хяналт тавьж ажиллах.
• Нийслэлийн Засаг даргын 2023 оны “Хууль, норм, дүрэм, стандартын хэрэгжилтийг хангуулах талаар авах зарим арга хэмжээний тухай” А/242 дугаар захирамжийн хэрэгжилтийг эрчимжүүлж, ажлын явц, үр дүнг Нийслэлийн Засаг даргын зөвлөлийн хуралд танилцуулах.
• Нийслэлийн Засаг даргын 2023 оны А/323 дугаар захирамжийн дагуу нийтийн эзэмшлийн газарт болон эзэмшиж, ашиглаж байгаа газраа дур мэдэн нэмэгдүүлж, зохих зөвшөөрөлгүйгээр хашаа, хайс барьсан зөрчлийг арилгах, газар чөлөөлөх ажлыг эрчимжүүлж, хэрэгжилтэд хяналт тавьж ажиллах.
• “Үндэсний соёл амралтын хүрээлэн”-д зургаадугаар сарын 9-11-нд “ICT EXPO-2023” арга хэмжээ зохион байгуулах тул бэлтгэл ажил болон мэргэжлийн чиг үүргийн байгууллагууд ажлын уялдаа холбоо, аюулгүй байдлыг сайтар ханган ажиллах.
• Иргэн, аж ахуйн нэгж, байгууллагаас гаргасан өргөдөл, гомдол, албан бичгийг хууль зүйн үндэслэлтэйгээр эцэслэн шийдвэрлэж, хэрэгжилтэд нь тогтмол хяналт тавьж ажиллах
• Нийслэлийн хэмжээнд “Сити дашбоард” нэвтрүүлсэнтэй холбогдуулан дараах 3 модулиудад мэдээллүүдийг 7 хоног тутамд шинэчлэн оруулах. Үүнд

1. Санхүү, төсвийн модуль,
2. Хөрөнгө оруулалтын модуль,
3. Аюулгүй байдлын модуль зэрэг ажлууд

• Нутгийн захиргааны байгууллагууд эхний хагас жилд төлөвлөсөн ажлууд эрчимжүүлж, гүйцэтгэл, үр дүнд тогтмол хяналт тавьж, дээд шатны байгууллагуудад гаргадаг тайлан, мэдээг хугацаанд нь хүргүүлж ажиллах.
• Улсын төсөв, орон нутгийн төсвийн хөрөнгөөр баригдаж байгаа сургууль, цэцэрлэгийн ажлын гүйцэтгэл, санхүүгийн хувьд нийцлэл нь ямар түвшинд байгаа талаарх мэдээллийг нэгтгээд Нийслэлийн Засаг даргын Тамгын газарт хүргүүлэх.
• Хөрөнгө оруулалтын ажлыг эрчимжүүлэхийг тус тус үүрэг болгов.

Өнөөдөр Наскон группээс өөрсдийн технологийг танилцуулж, хамтран ажиллах чиглэлээр дүүргийн Засаг дарга С.Даваасүрэнтэй уулзаж, ЗДТГ-ын ТНААХ-ийн дарга Д.Дэмчигжав, Багануур тохижилт ААТҮГ-ын захирал Д.Олзвой болон хороодын Засаг нарт технологийн талаар танилцууллаа.
Наксон технологийн үндсэн түүхий эд нь Дуосолид бодис юм. Тус технологийг Наскон групп нэвтрүүлээд байна. Уг технологи нь хөлдөлтөд тэсвэртэй, илүү бат бэх чанартай замын суурийг байгаль орчинд ээлтэй, хүнд хор хөнөөлгүй аргаар хэрхэн барихыг шийдэж өгч байгаагаараа онцлог. Дуосолид бодисыг хөрс шороотой хольсноор маш сайн бэхжиж, өвөл хөлдөж хагарахгүй, бат бэх замын суурийг үүсгэдэг юм байна.

Европын “Lab Analysis” лабораторийн шинжилгээний үр дүнгээс Nascon технологи нь шаварлаг хөрсөнд ашиглахад тохиромжтой, энэхүү технологийг элсэрхэг хөрсөнд шаварлаг хөрс шороо буюу цементийн нэмэлт хольцтой ашиглах боломжтой гэж гарсан байна.

Наксон технологийг ашиглан Монгол улсын зам, барилгын салбарт ашиглан хийж хэрэгжүүлэн ажиллаж байгаа юм байна.

Уулзалтаар энэхүү технологийг ашиглан ус ихээр тогтдог гудамж талбайн хэсэгт хэрэгжүүлэх боломжтой талаар санал солилцон эхний ээлжид судалгаа хийж, хэрэгжүүлэх талаар шийдэлд хүрлээ.