Category : Онцлох

• Дээрх уулзалтыг Монголын сууц өмчлөгчдийн холбоодын дээд зөвлөлөөс зохион байгуулсан юм.

МСӨХДЗ-ийн гүйцэтгэх захирал М.Галбаатар,  Мэргэжилтэн Ю.Ундрах, Н.Номинбаяр, дүүргийн Сууц өмчлөгчдийн холбоодын гүйцэтгэх захирлууд болон ажилтан албан хаагчид, хороодын орон сууц хариуцсан хэсгийн ахлагч нар, иргэд оршин суугчдын төлөөлөл оролцлоо.

Уулзалтаар:

• Орон сууцны ашиглалтын тухай хуулийн төсөл болон бусад хууль, дүрэм, журмын төслийн танилцуулга
• Монголын сууц өмчлөгчдийн холбоодын дээд зөвлөлийн 2022 онд хийж хэрэгжүүлсэн ажлын товч мэдээлэл, цаашдын зорилго, зорилт
• Сууц өмчлөгчдийн холбооны тулгамдаж байгаа асуудлыг зөвлөлдөн хэлэлцэж шийдлээ тодорхойллоо.

Дүүргийн удирдах ажилтны ээлжит шуурхай хуралдаан өнөөдөр боллоо. Шуурхай хуралдаанд өнгөрсөн 14 хоногт Засаг даргаас өгсөн үүрэг даалгаврын хэрэгжилт, гэмт хэрэг, зөрчлийн нөхцөл байдлын мэдээллийг танилцууллаа.

БАГАНУУР ДҮҮРЭГ ДЭХ ЦАГДААГИЙН ХЭЛТЭСТ 50 ДУУДЛАГА БҮРТГЭГДЖЭЭ

Өнгөрсөн 14 хоногт бүргэгдсэн дуудлага мэдээллийн талаар мэдээллийг ЦХ-ээс танилцууллаа.

Нийт 50 дуудлагаас гэмт хэргийн шинжтэй-14, зөрчлийн шинжтэй-36 дуудлага бүртгэгджээ. Мөн 16 хүн эрүүлжүүлэгдэж, 11 хүн жолоодох эрхээ хасуулсан байна. Иймд иргэдийг Замын хөдөлгөөний дүрмийг баримтлан архи согтууруулах ундааны зүйл хэрэглэсэн үедээ тээврийн  хэрэгсэл жолоодохгүй  байхыг цагдаагийн байгууллагаас анхаарууллаа.

АЮУЛТ ҮЗЭГДЭЛ, ОСЛООС 151 ИРГЭНИЙГ АВРАВ

Багануур дүүргийн Онцгой байдлын хэлтсийн дарга, дэд хурандаа Г.Батжаргал: “Өнгөрсөн 14 хоногийн хугацаанд 20 удаагийн дуудлагаар үүрэг гүйцэтгэж, 151 иргэний аюулгүй байдлыг ханган ажилласан” гэв.  

Цас их хэмжээгээр орж халтиргаа гулгаа ихэссэнтэй холбогдуулан холын замд зорчих иргэд, жолооч нар тээврийн хэрэгслийн бүрэн бүтэн байдлаа хангах, баталгаагүй замаар зорчихгүй байхыг онцгойлон анхаарууллаа. 

МОНГОЛ УЛСАД НУТГИЙН ӨӨРӨӨ УДИРДАХ ЁСНЫ БАЙГУУЛЛАГА ҮҮСЭЖ ХӨГЖСӨНИЙ 30 ЖИЛИЙН ОЙН ХҮРЭЭНД

ИТХ-ААС 5 ТОМООХОН ҮЙЛ АЖИЛЛАГАА ЗОХИОН БАЙГУУЛЛАА

ИТХ-ын ажлын албаны дарга Г.Гансэлэм: Монгол улсад нутгийн өөрөө удирдах ёсны байгууллага үүсэж хөгжсөний 30 жилийн ойн хүрээнд дүүргийн ИТХ-аас Мини парламент, Чадварлаг төлөөлөгч-2022, Үнэ цэнд суурилсан манлайлал, Шатрын аварга шалгаруулах тэмцээн, Хүндэтгэлийн хуралдааныг зохион байгуулсан байна.

2022 ОНД ХЭРЭГЖИЖ БУЙ ХӨРӨНГӨ ОРУУЛАЛТЫН АЖЛЫН ЯВЦ 91.4 ХУВЬТАЙ БАЙНА

Засаг даргын орлогч Б.Балжинням: “2022 онд хэрэгжиж буй хөрөнгө оруулалтын ажлын явцын мэдээллийг танилцууллаа.2022 онд 47 төсөл арга хэмжээ тендер сонгон шалгаруулалт зарлагдахаас 43 ажлын гүйцэтгэгч шалгарч  91,4%-тай. 2 ажил тендер нээх хугацаа болоогүй, 2 ажlын үнэлгээ хийгдэж байна”  гэлээ.

ДҮҮРГИЙН ХЭМЖЭЭНД ӨВӨЛЖИЛТИЙН БЭЛТГЭЛ АЖИЛ 96 ХУВЬТАЙ БАЙНА

Дүүргийн өвөлжилтийн бэлтгэл ажлын мэдээллийг ЗДТГ-ын ТНААХ-ийн дарга Д.Дэмчигжав танилцууллаа. Дэд бүтцийн байгууллагууд 96.9 хувьтай, төсөвт байгууллагууд 95.2 хувьтай байна. Мөн цас цэвэрлэгээний мэдээллийг танилцуулсан юм.

ЭНЭ САРЫН 09, 10-НД ЦАС ОРЖ, ЦАСАН ШУУРГА ШУУРНА

Багануур дүүргийн Цаг уурын өртөөний дарга Х.Энхчимэг: “Энэ сард агаарын дундаж температур ОЖД–аас хүйтэн, ихэнх хэсгээр ОЖД–аас ахиу цас орох төлөвтэй байна. Агаарын температур Нэгдүгээр арав хоногийн дунд үе, хоёрдугаар арав хоногийн ихэнх хугацаанд ОЖД–аас хүйтэн байх төлөвтэй байна. Харин гуравдугаар арав хоногийн сүүлчээр ихэнх нутгаар ОЖД–аас бага зэрэг дулаан байна.

Нэгдүгээр арав хоногийн эхэн болон сүүлч, хоёрдугаар арав хоногийн эхэн болон дунд үеэр цас орж, салхи зарим газраар 12–14 м/с, зарим үед түр зуур 16–18 м/с хүрч ширүүсэж болзошгүй байна” гэлээ.

МАЛ ТООЛЛОГО ЭХЭЛЛЭЭ

Дүүргийн Статистикийн хэлтсийн дарга Д.Жаргалмаа: “Монгол Улс жил бүрийн арван хоёрдугаар сарын 7-ноос 17-ны хооронд улс орон даяар малын тооллого зохион байгуулдаг. Энэ дагуу 2022 оны жилийн эцсийн мал тооллого өнөөдөр /2019.12.07/ эхэлж байна

Монгол Улсын нутаг дэвсгэрт байгаа малтай бүх өрх, аж ахуйн нэгж, байгууллагууд тооллогод хамрагдана. Мал тооллого нь мал аж ахуйн салбарын үйл ажиллагааг бодитой үнэлж, дүгнэх, макро түвшний тооцооллыг үнэн зөв тооцож, тодорхойлоход чухал ач холбогдолтой юм.” гэлээ

ИНЖЕНЕРИЙН ШУГАМ СҮЛЖЭЭНИЙ ХЭВИЙН, НАЙДВАРТАЙ АЖИЛЛАГААГ ХАНГАХЫГ ҮҮРЭГ БОЛГОЛОО

Шуурхай зөвлөгөөний төгсгөлд дүүргийн Засаг дарга С.Даваасүрэн нийслэлийн нутгийн захиргааны байгууллагууд төсвийн мөнгөөр шинэ жил тэмдэглэхгүй гэдгийг хэллээ. Мөн дараах үүрэг, даалгаврыг өгсөн юм.

-Инженерийн шугам сүлжээний хэвийн найдвартай ажиллагааг хангаж, ус, дулаан цахилгаан хангамжаар байгууллага, иргэдийг тасалдуулахгүй, гэнэтийн гэмтэл, саатал, гарахаас урьдчилан сэргийлэх, шуурхай ажиллагааны бригад, жижүүрийн хуваарь гарган, хяналт тавьж, болзошгүй осол, аливаа эрсдлээс урьдчилан сэргийлэх.
-Он дуустал үлдэж байгаа хугацаанд дүүрэг болон орлого бүрдүүлэгч байгууллагууд төсвийн орлого бүрдүүлэх ажлыг эрчимжүүлэн, энэ сарын 25-ны өдрийн дотор бүрэн төвлөрүүлэх.

-Төрийн хэмнэлтийн тухай хуулийн дагуу төсвийн зардлын хэмнэлтийг хэрэгжүүлж, төсвийн жилд өр авлага үүсгэлгүй ажиллах, төсвийг зориулалтын зүйлд зарцуулах, төсвийн сахилга хариуцлагыг сайжруулахад анхаарч ажиллах. 

-Байгууллагууд 2022 онд төлөвлөсөн ажлуудаа эрчимжүүлж хугацаанд гүйцэтгэж дуусгах, ажилтан, албан хаагчдынхаа үр дүнг дүгнэж ажиллах.

-Нийслэлийн нутаг дэвсгэрт иргэдийн амгалан тайван байдлыг хангах, нийгмийн хэв журам, гэмт хэрэг, зөрчилд өртөх, осгож, гэмтэхээс урьдчилан сэргийлэх, сэрэмжлүүлэх, аюулгүй байдлыг хангах, хяналт шалгалтын ажлыг эрчимжүүлж ажиллах.

-Нийтийг хамарсан баярын арга хэмжээний үеийн хэв журам сахиулах, бэлэн байдлыг хангах, архи, согтууруулах ундаа худалдан борлуулдаг, түүгээр үйлчилдэг аж ахуйн нэгж байгууллагын үйл ажиллагаанд хяналт тавих.

-Нийслэлийн нутгийн захиргааны нийт байгууллагууд “Шинэ жилийн баяр”-ын арга хэмжээг зохион байгуулахдаа төсвийн хөрөнгө зарцуулахгүй байх,

-Дүүргийн ИТХ-ын ээлжит 19-р хуралдаанаар хэлэлцэх асуудлыг өргөн барих, хурлын бэлтгэл ажлыг холбогдох байгууллагууд хангаж ажиллах

-Мал тооллогын ажлыг хугацаанд нь сайтар зохион байгуулах,

-Байгууллагууд Засаг даргын 2023 онд хэрэгжүүлэх үйл ажиллагааны хөтөлбөрт тусгах саналыг хугацаандаа ирүүлэх 

-Байгууллагууд Засаг даргын 2023 онд хэрэгжүүлэх үйл ажиллагааны хөтөлбөрт тусгах саналыг хугацаандаа ирүүлэхийг тус тус үүрэг болгов.

Монгол улсын томоохон гол мөрний нэг төдийгүй Хэрлэн гол нь газарт түүх, археологийн олон мянган олдвор, үнэт өв түүний сав газарт хадгалагдан байдаг билээ.

Хэрлэн гол нь Хэнтийн нуруунаас эх аван Багануур дүүргийн зүүн хилээр 20 гаруй км урсан өнгөрдөг бөгөөд Дунд, Баруун байдлагын гол, Нарийний гол, Хуцаагийн гол, Хужиртын гол цутгадаг юм.

Хэрлэн голын сав газарт Хэнтий, Төв, Говьсүмбэр, Сүхбаатар, Дорнод аймгууд багтдаг ба Монгол Улсын Ерөнхийлөгч У.Хүрэлсүхийн санаачилгаар Хэрлэн голыг хамгаалах ажлыг зохион байгуулах ажлын хэсгийг БОАЖЯ, холбогдох агентлаг, аймаг, дүүргийн Засаг дарга нарын бүрэлдэхүүнтэйгээр байгуулсан талаар өмнө уншигч та бүхэнд мэдээлж байсан билээ.

Тэгвэл дээрх ажлын хүрээнд Багануур дүүргийн Хэрлэн голыг хамгаалах ажлын хэсэг анхны хурлаа зохион байгууллаа. Хурлаар:

• Хэрлэн голын дагуух зарим газрыг орон нутгийн тусгай хэрэгцээнд авах, онцгой болон энгийн хамгаалалтын бүс, ус хангамжийн эх үүсвэрийн эрүүл ахуйн бүсийн заагийг тогтоож, тэмдэгжүүлэх, бүсийн дэглэмийг тогтоох саналыг судалж боловсруулах,
• “Тэрбум мод үндэсний хөдөлгөөн”-ий хүрээнд Хэрлэн голын сав газарт мод тарих газрын байршил сонгох, нэгдсэн төлөвлөгөө гаргах,
• Хог хаягдал, малын сэг зэм, өтөг бууцнаас үүсч болох хүний эрүүл мэнд, байгаль орчинд үзүүлэх сөрөг нөлөөллийг бууруулах, урьдчилан сэргийлэх ажлыг төлөвлөн зохион байгуулах, эрчимжүүлэх, цэвэрлэх, хяналт, хариуцлагыг чангатгах,
• Хэрлэн цэвэр усны станц, цэвэрлэх байгууламжийн технологийн шинэчлэлийг яаралтай хийхУсны сан бүхий газрын
• Хөрс бохирдуулагч нүхэн жорлонгийн тоог үе шаттайгаар бууруулах арга хэмжээг авах, стандартын шаардлага хангасан эко ариун цэврийн байгууламж байгуулах ажлыг төлөвлөх
• Цутгалан гол, горхи, булаг шандны эхийг хашаажуулж, хамгаалах
• Эрэг, дивиз орчмын газрын эвдрэл, байгаль орчныг нөхөн сэргээх, ашигт малтмал зөвшөөрөл, лиценз, газар эзэмшигч аж ахуйн нэгж, хувь иргэн, малчдын талаарх судалгааг нарийвчлан гаргах зэрэг асуудлыг тусган баталлаа.

Төлөвлөгөөг Байгаль орчин, аялал, жуулчлалын яаманд 2023 оны үйл ажиллагааны төсөв, төлөвлөгөөнд тусгах саналыг хүргүүлэхээр болов.

Өдгөөгөөс 98 жилийн тэртээд  буюу 1924 оны 11 дүгээр сарын 26-ны өдөр  Монгол улс анхдугаар Үндсэн хуулиа баталж, Хаант засгаас Бүгд найрамдах засаглалд шилжиж, хамжлагат ёсыг халан, үндэсний ардчилсан өөрчлөлт, эрхзүйн чухал зарчмууд, улс төрийн цоо шинэ тогтолцоог хуульчлан баталгаажуулсан бөгөөд энэ нь Монголын түүхийн асар том үйл явдал юм.

Тэр цагаас хойш 11 дүгээр сарын 26-ны өдрийг ёслол төгөлдөр тэмдэглэн ирсэн ба  өнөөдөр бид 98 дэх   жилдээ тэмдэглэж байна. Энэхүү өдрийг бид  Төрийн албан хаагчдын баярын өдөр  болгон тэмдэглэсээр багагүй хугацаа өнгөрөөд байна.

Улс тунхагласны өдрийг тохиолдуулан баярын хурлыг зохион байгуулсан бөгөөд урилгаар УИХ-ын гишүүн Ц.Сандаг-Очир, дүүргийн ИТХ-ын төлөөлөгчид, төрийн байгууллагын удирдлагууд хүрэлцэн ирж төрийн албан хаагчдад баяр хүргэлээ.

Монгол Улсын Ерөнхийлөгч У.Хүрэлсүх Чингис хааны  эш хөргийг нь дээдлэн залах тухай 159 дүгээр Зарлигийн дагуу төрийн байгууллагуудад Их эзэн Чингис хааны эш хөргийг гардуулан өглөө.

Мөн төрийн жинхэнэ албанд хамгийн олон жил ажилласан Шүүхийн Тамгын газрын дарга, эрхэлсэн түшмэл  Б.Эрдэнэбаяр, хамгийн залуу төрийн албан хаагч болох дүүргийн ИТХ-ын Ажлын албаны Хэвлэл мэдээллийн ажилтан Ө.Шижир-Од нар алба хаагчдад сэтгэгдлээ хэлсэн юм.

Энэ үеэр салбартаа тэргүүлж ажилласан зарим эрхмүүдэд шагнал гардууллаа. Мөн дүүргийн Засаг даргын Тамгын газраас Монгол хэлний тухай хууль, “Монгол бичгийн үндэсний хөтөлбөр III”-ыг  хэрэгжүүлэх, төрийн албан хаагчдыг үндэсний бичгээ эрхэмлэн дээдэлж, суралцах, зөв хэрэглэх, уламжлалт бичиг соёлтой Монгол хүн гэдгээрээ бахархах, олон нийтэд сурталчлах зорилгоор “Үндэсний бичиг-Үнэт өв” сэдэвт уралдаан зохион байгуулсан бөгөөд уг уралдааны 1-р шатны шалгаруулалтад 110 төрийн албан хаагч оролцсоноос шилдэг 8 цэвэр бичигтэнг шалгаруулж, 2-р шатанд 4 оролцогчдод шагналыг гардууллаа.

Тодруулбал:

-ТЭРГҮҮН  байранд Нийслэлийн ерөнхий боловсролын Гүн галуутай цогцолбор сургуулийн Гадаад хэлний багш Б.Азбилэг,

-ДЭД   байранд Нийслэлийн ерөнхий боловсролын Гүн галуутай цогцолбор сургуулийн Монгол хэл, бичиг, уран зохиолын багш Г.Ганцэцэг,

-ГУТГААР  байранд Оюуны эрин цогцолбор сургуулийн Англи хэлний багш Д.Батцэцэг,

-ДӨТГӨӨР  байранд Боловсролын хэлтсийн дарга Н.Алтансүх нар тус тус шалгарлаа.

ТА БҮХЭНДЭЭ УЛС ТУНХАГЛАСНЫ 98 ЖИЛИЙН ОЙН БАЯРЫН МЭНДИЙГ ХҮРГЭЕ.