Инженерийн болон төрийн байгууллагууд баярын хугацаанд өндөржүүлсэн бэлэн байдалд ажиллана

Удирдах ажилтнуудын шуурхай хуралдаан болж, өмнөх хуралдааны үүрэг даалгаврын хэрэгжилт, дүүргийн хэмжээнд хийгдэж буй орон сууцны судалгаа, зураг төсөвтэй болон зураг төсөв боловсруулагдаж буй ажлууд, Багануур дүүргийн теле камерын хяналтын дэд төв ОНТҮГ-ын үйл ажиллагаа, татвар төлөгчийг ажлын байраар нь таньж мэдэх, зөвлөн туслах үйлчилгээ-2025, төсвийн орлого, Худалдан авах ажиллагааны албаны тендерийн явц, цаг агаарын төлөв байдлын талаар мэдээлэл сонслоо. Өмнөх шуурхай зөвлөгөөнөөр нийт 11 үүрэг даалгавар өгснөөс хэрэгжилт 95.2 хувьтай байна.

Сар шинийн баярын өдрүүд буюу хоёрдугаар сарын 17-23-ны өдрийг дуустал инженерийн хангамжийн болон нутгийн захиргааны байгууллагууд хариуцлагатай жижүүр томилон, өндөржүүлсэн бэлэн байдалд ажиллана.

Багануур дүүргийн теле камерын хяналтын дэд төв ОНТҮГ нь 2024-2028 онд “Ногоон-Ухаалаг хот” зорилтыг хэрэгжүүлэн ажиллаж байна. Дүүргийн хэмжээнд нийт 140 камер суурилуулснаас 134-ийг хяналтын төвд холбож, мөн 23 байгууллага, аж ахуйн нэгжийн 58 камерыг системд нэгтгэсэн байна. Иргэд болон Цагдаагийн хэлтсээс ирүүлсэн гомдол, хүсэлтийг тухай бүр хүлээн авч, шаардлагатай мэдээлэл, лавлагааг шуурхай шийдвэрлэн, камерын бичлэгийг холбогдох байгууллагад хүргүүлжээ. Мөн хэт өндөрт байрласан камеруудыг намсгаж, тээврийн хэрэгслийн марк, улсын дугаар болон иргэдийн царай таних боломжийг бүрдүүлэн хиймэл оюун ухаанд суурилсан системийг нэвтрүүлэн ажиллаж байна.

Дүүргийн хэмжээнд шинээр 5 төсөл хэрэгжиж, 329 айлын орон сууц ашиглалтад орсон бол 2253 өрхийг хамрах 5 орон сууцны төсөл хэрэгжиж байна.

Цаг агаарын төлөвийн тухайд 2026 оны хоёрдугаар сарын 20-ныг хүртэл тогтуун байх бөгөөд 21-ний өдөр цас орж, цасан шуурга шуурч, салхи ширүүсч, хүйтний эрч эрс чангарахыг холбогдох байгууллагаас анхаарууллаа.

Шуурхай зөвлөгөөний төгсгөлд Засаг дарга С.Даваасүрэн сар шинийн баярын өдрүүдэд ажиллах чиглэлээр дараах үүрэг даалгаврыг өглөө.

Газар хөдлөлтийн гамшгаас урьдчилан сэргийлэх ажлыг эрчимжүүлж, нийслэлийн салбар зөвлөлтэй уялдуулан шаардлагатай зардлын тооцоо, судалгааг гаргаж, үр дүнг тооцон ажиллах
Гал түймэр, гамшиг ослоос урьдчилан сэргийлж, өндөржүүлсэн бэлэн байдалд ажиллах, гэр хороолол болон эрсдэл өндөр бүсэд тандалт, эргүүл, хяналтыг нэмэгдүүлж, иргэдэд сэрэмжлүүлэг тогтмол хүргэх
Эрүүл мэндийн төвийг нэмэлт эмч, түргэн тусламжийн автомашинаар хангаж, хоол хүнсний хордлого болон архи, согтууруулах ундаатай холбоотой эрсдэлээс сэргийлэх
Гэмт хэрэг, зөрчлөөс урьдчилан сэргийлэх зорилгоор эргүүл, хяналтыг нэмэгдүүлж, олон нийтийн газарт эмх замбараагүй байдал үүсэхээс сэргийлэх
Замын хөдөлгөөний аюулгүй байдлыг хангаж, согтуугаар тээврийн хэрэгсэл жолоодох, хурд хэтрүүлэх зэрэг зөрчлийг бууруулах чиглэлээр хяналт шалгалтыг эрчимжүүлэх
Газрын үнэлгээний ажлыг эрчимжүүлж, эхний ээлжийн газар чөлөөлөх саналыг боловсруулан танилцуулах
Тендерийн ажлын явцыг эрчимжүүлж, 03 дугаар сарын 10-ны дотор зарлаж дуусгах
Орон сууцны фасад засварын ажлын зураг төслийг эрчимжүүлэх
Төсвийн тодотголын саналыг боловсруулан танилцуулах
Инженерийн шугам сүлжээний найдвартай ажиллагааг хангаж, аваарын бригадийг 24 цагийн бэлэн байдалд ажиллуулах
Агаарын чанарын суурин станцыг нүүлгэн шилжүүлэх асуудлыг судлан танилцуулах
Нохой, муур устгалын саналыг нийслэлд хүргүүлэх.