Хоолны газар ажиллуулахад болон ажлын байранд тавигдах шаардлагууд

10455863_1433946760209290_4305411253213742779_nНМХГ-аас ирсэн зөвлөмж:
ХООЛНЫ ГАЗАР АЖИЛЛУУЛАХАД БОЛОН АЖЛЫН БАЙРАНД
ТАВИГДАХ ШААРДЛАГУУД
2014.06.27
Хоолны газрын барилга байгууламж нь засвар үйлчилгээ, цэвэрлэгээ, халдваргүйтгэл хийхэд хялбар дөхөм, бат бөх материалаар хийгдсэн,дотоод зохион байгуулалт, туслах байгууламжийг технологи урсгалын дагуу эрүүл ахуйн шаардлагад нийцүүлэн зөв зохион байгуулсан байна. Ажилчдын бие засах газрыг үйлчлүүлэгчдийнхээс тусад нь зохион байгуулах ба хаалга нь хоол үйлдвэрлэл явуулдаг цех рүү онгойхгүй байхаар төлөвлөхөөс гадна хувцасны өрөөг хүнстэй харьцах хэсгээс бүрэн тусгаарлаж, шууд залгаа байрлуулахгүй байвал зохино. Барилга байгууламжийн шал, хана, тааз зэргийг угааж цэвэрлэх боломжтой цайвар өнгийн материалаар хийх нь өнгө үзэмжтэй, цэвэрлэгээ хийхэд хялбар, тоос шороо тогтох нь бага байдгийг анхаарах хэрэгтэй. Ажлын байрны дотоод тоноглол, тохижилт нь хоолны газрын төрөл ангилалаас шалтгаалаад өөр өөр онцлогтой байна.
Нэг. Ресторан
1. Стандартын шаардлага хангасан, үйлдвэрлэлийн технологийн урсгалыг зөв зохион байгуулсан ажлын байртай, хоол үйлдвэрлэхэд шаардлагатай тоног төхөөрөмжийг суурилуулсан, багаж хэрэгслээр жигд хангагдсан байна.
2. Нарийн технологи ажиллагаагаар хийх олон нэр төрлийн халуун хоол, зууш нэрийн болон захиалгат хоол үйлдвэрлэж хэрэглэгч үйлчлүүлэгчийн тав тухтай амарч хооллох нөхцлийг бүрдүүлсэн байх,
3. Чадварлаг өндөр зэрэглэлийн мэргэжлийн тогооч, зөөгч, бармен гэх мэт туслах ажилчдаар хүрэлцээтэй хангагдаж дээд зэргийн үйлчилгээ зохион байгуулах боломж нөхцлийг бүрдүүлсэн байх,
Рестораныг нийтийн үйлчилгээний, зочид буудлын дэргэдэх, амралт сувиллын, түргэн үйлчилгээний гэх мэтээр ангилдаг бөгөөд сүүлийн үед олон улсад түгээмэл болоод байгаа тав тухыг илүүтэйгээр эрхэмлэсэн “лоунж ресторан” нэмэгдэж байна.
Хоер. Кафе
Ресторанаас ялгаатай нь үйлдвэрлэх халуун хоол, зуушны нэр төрөл харьцангуй цөөн, гол төлөв үйлдвэрлэх хоол, бүтээгдэхүүний нэр төрлөөр төрөлжсөн байх бөгөөд нарийн боов, цай, кофе, хөөрүүлсэн сүү, халуун шоколад зэрэг төрөл бүрийн халуун, хүйтэн ундаагаар илүүтэй үйлчилнэ. Кафены үйлчилгээний танхим нь ресторантай харьцуулахад хэмжээгээр арай бага байна. Гурав. Баар
Өндөр лангуу, босоо сандал, ханын гоёмсог шүүгээ, тавиур гэрэлтүүлэг, намхан жижиг ширээ, буйдан, хөгжим болон гэрэлтүүлгийн төхөөрөмж хэрэгслээр тоноглогдсон байдгаараа ялгаатай. Хоол бүтээгдэхүүний хувьд амар хялбар аргаар үйлдвэрлэх цөөн нэр төрлийн халуун хоол, зуушаар үйлчилнэ.
Мөн төрөл бүрийн ундаа, коктейль, хөнгөн зууш, десертний зүйлээр үйлчлэх тул мэргэжлийн мэргэшсэн бартендертай байхыг илүү анхаарна.
Баар нь үйлчилгээний онцлогоороо диско, стриптиз, караоке, билльяард, хөнгөн зуушны снек, суши, грилл гэх мэт төрөлтэй байна.
Дөрөв. Гуанз
Гуанз нь зах зээлийн эрэлт хэрэгцээнд түшиглэсэн, нарийн технологи ажиллагаа бага шаардах харьцангуй хямд үнэтэй, нэр төрөл нь өдөр өдөрт өөрчлөгдөж болох халуун хоол, зууш, халуун, хүйтэн ундаагаар түргэн шуурхай үйлчилдэг хоолны газар. Ажлын байрны хувьд ширээ, сандал нь зөөлөвчгүй байж болох бөгөөд ресторанаас ялгаатай нь тохижилтын хувьд аль болох хөнгөн хямд угааж цэвэрлэхэд хялбар тавилгуудтай байна.
Дээрх хоол үйлдвэрлэл үйлчилгээний газрууд нь /хоолны газар/ төвлөрсөн дулаан, цэвэр бохир усан системд холбогдсон мэргэжлийн байгууллагын зураг төслийн дагуу баригдсан байхаас гадна орчны талбай цэвэрхэн, хатуу хучилттай тохижилт хийгдсэн байна.
Хоол үйлдвэрлэлийн ажлын байр буюу гал тогооны өрөөний агааржуулалтын систем нь илүүдэл чийг уур, хоолны үнэр зэргийг сорох хүчин чадал сайн хэвийн ажиллагаатай байна. Хэрэв агааржуулалтын систем хүчин чадлын хэмжээнд ажиллаагүй тохиолдолд халуун ажиллагааны явцад гарсан чийг уур нь ус болж өрөөний тааз хананд тогтож улмаар будаг шохой тогтохгүй хууларч унах, хоол хүнсэнд орох асуудал үүсгэнэ. Тиймээс хана тааз, хаалга, шал зэргийг ус чийгэнд тэсвэртэй материалаар хийх нь чухал.
Мөн хоол үйлдвэрлэлийн ажлын байрны өрөөний цонх нь битүүмжлэл сайтай хорхой шавьж ялаанаас хамгаалсан торон хаалттай, цонхны тавцанг тавиур болгож ашиглахгүй байхаар налуу хийнэ.
Мэдрэгчээр ажилладаг буюу бугуй тохойгоор ажилладаг гар угаах угаалтууруудтай, гар хатаагч эсвэл цаасан сальфеткатай саван ариутгалын бодисоор хангагдсан байна.
Тогооч ажиллагсдыг хоолны газарт авч ажиллуулахын өмнө эрүүл мэндийн урьдчилан сэргийлэх үзлэгт заавал хамруулах, эсвэл эрүүл мэндийн үзлэгт хамрагдсан хүн авч ажиллуулах шаардлагатай.
Гал тогоонд ажиллаж буй тогооч ажиллагсад нь халаад, хормогч зэрэг ажлын хувцсыг өмсөж хэвшсэн байх бөгөөд үсийг бүрэн халхалсан малгайтай, ээмэг, бөгж, цаг зэргийг зүүхгүй, хумсийг ургуулахгүй, будахгүй гарын ариун цэврийг сайтар сахиж ажиллана.
Гал тогоонд гадны хүн орох тохиолдолд нөмрөг, малгай, улавч зэргийг өмсүүлдэг байх нь чухал.
Хог хаядлыг тогтмол зайлуулдаг, угаалга цэвэрлэгээг хуваарийн дагуу тогтмол хийж бүртгэл хөтөлдөг байх ба гал тогоонд байрлаж буй бохир усны трап цооногыг тогтмол цэвэрлэж халдваргүйжүүлсэн байна.
Цэвэрлэгээг хийж дууссаны дараа цэвэрлэгээний багаж хэрэгслийг угааж халдваргүйжүүлэн бүртгэл хөтөлнө.
Хортон шавьжийн устгалыг мэргэжлийн байгууллагаар улирал дутам хийлгэж бүртгэл хөтөлдөг байвал зохино.
Ариутгал цэвэрлэгээний бодис нь чанарын шаардлага хангасан байх бөгөөд тэдгээрийг хүнсний бүтээгдэхүүнээс тусад нь хадгална.
Хоолонд хэрэглэх түүхий эд бүтээгдэхүүн нь шинжилгээний бичиг, баталгаажилттай байх бөгөөд тогтмол гэрээт нийлүүлэгчээс хүлээн авдаг байвал зохино.
Хоолны газар нь хүнсний бүтээгдэхүүнийг хадгалах зориулалтын хөргөх, хөлдөөх төхөөрөмжөөр бүрэн хангагдсан байх бөгөөд түүхий болон хагас боловсруулсан бүтээгдэхүүнийг тусд нь хадгалж хадгалалтын горимыг өдөр бүр хянаж бүртгэл хөтөлнө.
Хоол үйлдвэрлэлд хэрэглэх түүхий эд бүтээгдэхүүнийг хүлээн авч мэдрэхүйн үзүүлэлтээр шалгаж ангилан ялгалт хийх зориулалтын цэг байх шаардлагатай. Ангилан ялгасан хүнсний түүхий эд бүтээгдэхүүнийг хөргөх төхөөрөмжид төрөлжүүлэн хадгална.
Гал тогоонд овор хэмжээ ихтэй хайрцаг савтай, баглаа боодолтой зүйлийг оруулахыг хориглоно. Угаалгын хэсэгт угааж цэвэрлэсэн аяга, таваг халбага, сэрээ сав суулгыг дахин бохирдохгүй нөхцөлд хадгална. Угаалгын цехгүй жижиг хоолны газруудад угаалгын хэсгийг 1,5 м-ээс доошгүй өндөртэй хаалтаар халуун ажиллагааны хэсгээс тусгаарлана. Гампанзыг түүхий ба болсон бүтээгдэхүүн, загас, далайн гаралтай бүтээгдэхүүн, мах, ногоо зэргээр ялгах тэмдгээр болон өнгөөр ялгаж хэрэглэнэ. Хоол үйлдвэрлэлийг батлагдсан жор технологийн дагуу бэлтгэн боловсруулж орц нормыг мөрдөж ажиллана.
Хоолыг хайрч шарах ажиллагаанд хэрэглэж буй тос шинэ байх бөгөөд өдөр өдөрт нь тосыг сольж байх шаардлагатай. Хоолны дээжийг өдөр тутам хоол тус бүрээс авч тусгай хөргөх төхөөрөмжид 48 цаг хадгалж бүртгэл хөтөлнө.
Бэлтгэсэн хоолыг зохих температурт байлгаж тогтоосон хугацаанд нь борлуулж дуусгана. Хэрэв хоолны үлдэгдэл гарсан тохиолдолд устгаж бүртгэл тэмдэглэл хөтөлнө. Хоол үйлдвэрлэл, үйлчилгээнд дотоод хяналтын журам боловсруулж болзошгүй эрсдэл бий болохоос урьдчилан сэргийлж хяналт тавьж ажиллана.
Хоолны газарт ажиллагсад мэргэжлийн байх бөгөөд тогтвор суурьшилтай ажиллах шаардлагатай. Ажиллагсдад ариун цэвэр эрүүл ахуй, хүнсний аюулгүй байдлын чиглэлээр дотооддоо сургалт зохион байгуулах эсвэл сургалтад хамруулж ямар сэдвээр сургалт хийсэн болон хамрагдсан талаар бүртгэл тэмдэглэл хөтөлнө.
Сүүлийн жилүүдэд урин дулааны улиралд гадна талбай, гудамжинд хоол, ундааг шууд хэрэглэх зориулалтаар зарж борлуулахад зориулсан байнгын болон хөдөлгөөнт байр ажиллуулах хандлага бий болж байна.
Энэ тохиолдолд хөдөлгөөнт байр нь хангалттай гэрэлтүүлэгтэй, байнга цэвэр байдлыг хангасан, ямар нэгэн бохирдлын эх үүсвэрээс хол байрлах ёстой.
Гадна талбайн борлуулалтын хэсэг нь орон нутгийн засаг захиргаанаас зөвшөөрөгдсөн газарт байрлах ба замын хөдөлгөөн, явган зорчигч, амьтан болон бусад бохирдлын эх үүсвэрээс хамгаалагдсан байна. Тоног төхөөрөмж нь цэвэрлэх, халдваргүйжүүлэх ажлыг гүйцэтгэхэд хялбар материалаар хийсэн байх шаардлагатай.
Авч явах хоол хүнсийг бохирдол үүсгэдэггүй, хүнсний зориулалтын цаасан уут, хуванцар саванд хийнэ.
Аюулгүй байдлыг хангахын тулд гадна талбайн борлуулалтын хэсэгт хоол бүтээгдэхүүнд их хэмжээний боловсруулалт хийхээс зайлсхийх хэрэгтэй.
Түргэн гэмтэх түүхий эд, бүтээгдэхүүнийг зөвхөн тохирох температурт хадгалсан нөхцөлд л худалдаж борлуулна.
Хоол, хүнснийг бохирдохоос сэргийлэн тохирох нөхцлийг хангаж, зохих температурт зориулалтын тээврийн хэрэгсэл, төхөөрөмжөөр тээвэрлэнэ.
Савласан бүтээгдэхүүнийг стандартын шаардлага хангасан шошготойгоор эрүүл ахуйн ерөнхий зарчмын дагуу хадгалж худалдаална.
Түүхий эд, сав, баглаа боодлыг аюулгүй, эрүүл ахуйн шаардлагад нийцсэн цэвэр чингэлэг сав, хөргөгч, хөлдөөгчинд хүлээн авч хадгална.
Хадгалах сав , хайрцаг зэрэг нь аюул, хоргүй материалаар хийгдсэн, тоос шороо болон бусад бохирдлоос хамгаалагдсан байна.
Хоол хүнс бэлтгэх болон хэрэглэхийн хоорондох хугацааг дараах байдлаар зохицуулна. Үүнд:
Хүнсийг 600 С-ээс дээш температурт хадгалагдсан бол 6 цаг хүртэл
Хүнсийг хамгийн ихдээ 50 С хүртэл температурт хадгалагдсан бол нэг өдөр.
Халуун хоолыг 50 С-ын температур хүртэл хөргөж гурван цагаас ихгүйгээр.
Хөргөсөн хоолыг яг хэрэглэхийн өмнө 700 С температур хүртэл халаана.
Гудамж, гадна талбайн борлуулалтын цэг дээр бэлтгэж буй сэндвичийг яг хэрэглэхийн өмнө бэлтгэж олгоно.Шинэ салат, жимсний хоолыг хэрэглэгч хэрэглэхийн өмнө амтална. Бусад төрлийн / майонез болон салатны крем, бяслаг, хиамны орцтой ногооны/ салатыг бэлдсэнээс хойш хэрэглэх хүртэл 50 С температурт хадгална. Хэрэглэхийн өмнө халаах, болгох /пицца, кебаб зэрэг/ хоолыг 50 С-ээс доош температурт хадгална.Хоолыг бэлтгэхдээ зөвхөн тухайн өдөр борлуулах хэмжээгээр бэлтгэж үлдэгдэл хоол үлдсэн тохиолдолд ашиглахгүй устгана.
Аяга, таваг, халбага сэрээ зэрэг үйлчилгээний багаж хэрэслүүд нь зөвхөн нэг удаагийн зориулалттай байх ба хог хаягдлыг хийх зориулалтын таглаатай хогийн савтай байна. Хогийн сав нь хүнс бэлтгэх талбайгаас зайтай, автоматаар хаагддаг таглаатай бол сайн. Хатуу хог хаягдлыг дахин боловсруулах болон боловсруулахгүй гэж тусд нь ялгаж хийнэ.
БОЛОВСРУУЛСАН: ХҮНСНИЙ ЧАНАР, АЮУЛГҮЙ БАЙДЛЫН
ХЯНАЛТЫН УЛСЫН АХЛАХ БАЙЦААГЧ О.НЯМДАВАА

10475249_1433946770209289_2228639041563099738_n